പ്രബന്ധരചന: കാഷ് അവാർഡ് സമ്മാനിച്ചു
തേഞ്ഞിപ്പലം: കോളജ്, സർവകലാശാല ഡിഗ്രി, പിജി വിദ്യാർഥികൾക്കായി സംഘടിപ്പിച്ച സുവർണ ജൂബിലി പ്രബന്ധരചനാ മത്സരത്തിലെ വിജയികൾക്ക് വൈസ് ചാൻസലർ ഡോ.കെ.മുഹമ്മദ് ബഷീർ സർട്ടിഫിക്കറ്റുകളും കാഷ് അവാർഡുകളും സമ്മാനിച്ചു.
സർവകലാശാലാ പബ്ലിക് റിലേഷൻസ് വിഭാഗം, ഖത്തറിലെ മലയാളി സംഘടനയായ മംവാഖിന്റെ സഹകരണത്തോടെ സംഘടിപ്പിച്ച പ്രബന്ധ രചനാ മത്സരത്തിൽ കാന്പസിലെ എംഎ മലയാളം വിദ്യാർഥിനി ടി. അമൃത ഒന്നാം സമ്മാനമായ 25,001 രൂപയും, ഫറോക്ക് റൗളത്തുൽ ഉലൂം അറബിക് കോളജിലെ ഒന്നാം വർഷ ബിഎ അഫ്സൽഉൽഉലമ വിദ്യാർഥിനി പി.എം. വാഫിറ ഹന്ന രണ്ടാം സമ്മാനമായ 15,001 രൂപയും ഏറ്റുവാങ്ങി. ഫാറൂഖ് കോളജിലെ മൂന്നാം വർഷ ബിഎ മലയാളം വിദ്യാർഥിനി ഫാത്തിമാ തസ്നി വരിക്കോടനാണ് മൂന്നാം സ്ഥാനമായ 10,001 രൂപക്ക് അർഹത നേടിയത്.
വിവിധ കോളജുകളിലെ മറ്റ് പത്ത് പേർക്ക് 1,001 രൂപ വീതവും ലഭിച്ചു. സമ്മാനദാന ചടങ്ങിൽ രജിസ്ട്രാർ ഡോ.ടി.എ.അബ്ദുൾ മജീദ്, മംവാഖ് പ്രസിഡന്റ് ഉസ്മാൻ കല്ലൻ, ജനറൽ സെക്രട്ടറി എൻ.കെ.എം. ഷൗക്കത്ത്, സർവകലാശാലാ പബ്ലിക് റിലേഷൻസ് ഓഫീസർ എം.വി. സക്കറിയ തുടങ്ങിയവർ പങ്കെടുത്തു.