സിഐപിഇടിയിൽ പ്ലാസ്റ്റിക് ടെക്നോളജിയിൽ ഡിപ്ലോമ
കേന്ദ്ര രാസവസ്തു, രാസവളം മന്ത്രാലയത്തിനു കീഴിൽ ചെന്നൈയിലുള്ള സെൻട്രൽ ഇൻസ്റ്റിറ്റ്യൂട്ട് ഓഫ് പ്ലാസ്റ്റിക് ആൻഡ് എൻജിനിയറിംഗ് ടെക്നോളജി (സിഐപിഇടി) ഈ മേഖലയുമായി ബന്ധപ്പെട്ട പ്രഫഷണലുകളെ വാർത്തെടുക്കുന്നതിലും ഗവേഷണം നടത്തുന്നതിലും ലോകോത്തര നിലവാരമുള്ള സ്ഥാപനമാണ്. ചെന്നൈ ആസ്ഥാനമായുള്ള സിഐപിഇടിക്കു കൊച്ചി ഉൾപ്പടെ രാജ്യത്തെ വിവിധ സ്ഥലങ്ങളിലായി 16 സെന്ററുകളുമുണ്ട്. കൂടാതെ ചെന്നൈ, അഹമ്മദാബാദ്, ലക്നോ, ഭുവനേശ്വർ എന്നിവിടങ്ങളിലെ ഹൈ ലേണിംഗ് സെന്ററുകൾ വഴിയും മികച്ച തൊഴിൽ സാധ്യതയുള്ള ഡിപ്ലോമ കോഴ്സ് മുതൽ ബിരുദ, ബിരുദാനന്തര, ഗവേഷണ കോഴ്സുകൾ വരെ നടത്തുന്നു.
സിഇപിടി ജോയിൻറ് എൻട്രൻസ് എക്സാമിനേഷൻ വഴിയാണ് അഡ്മിഷൻ.
പോസ്റ്റ് ഡിപ്ലോമ, പോസ്റ്റ് ഗ്രാജ്വേറ്റ് ഡിപ്ലോമ, ഡിപ്ലോമ കോഴ്സുകളിലേക്കാണ് ഇപ്പോൾ അപേക്ഷിക്കാവുന്നത്.
പോസ്റ്റ് ഗ്രാജ്വേറ്റ് ഡിപ്ലോമ ഇൻ പ്ലാസ്റ്റിക് പ്രോസസിംഗ് ആൻഡ് ടെസ്റ്റിംഗ്: ഒന്നര വർഷത്തെ കോഴ്സിന് കെമിസ്ട്രി ഒരു വിഷയമായി പഠിച്ച് ബിരുദം നേടിയവർക്ക് അപേക്ഷിക്കാം. പ്രായം 25 വയസ് കവിയരുത്.
പോസ്റ്റ് ഗ്രാജ്വേറ്റ് ഡിപ്ലോമ ഇൻ പ്ലാസ്റ്റിക് ടെസ്റ്റിംഗ് ആൻഡ് ക്വാളിറ്റി മാനേജ്മെന്റ്: ഒന്നര വർഷത്തെ കോഴ്സിന് ഫിസിക്സോ കെമിസ്ട്രിയോ എടുത്തു ബിരുദം നേടയിവർക്ക് അപേക്ഷിക്കാം. പ്രായ പരിധി 25 വയസ്.
പോസ്റ്റ് ഡിപ്ലോമ ഇൻ പ്ലാസ്റ്റിക് മോൾഡ് ഡിസൈൻ: മെക്കാനിക്കൽ, പ്ലാസ്റ്റിക്സ് ടെക്നോളജി, പ്രൊഡക്ഷൻ, മെക്കാട്രോണിക്സ്, ഓട്ടോമൊബൈൽ, ടൂൾ ആൻഡ് ഡൈ മേക്കിംഗ് എന്നിവയിൽ ത്രിവത്സര ഡിപ്ലോമയാണു അപേക്ഷിക്കാനുള്ള യോഗ്യത. പ്രായം 25 കവിയരുത്. കോഴ്സ് കാലാവധി ഒന്നര വർഷം.
ഡിപ്ലോമ ഇൻ പ്ലാസ്റ്റിക് മോൾഡ് ടെക്നോളജി, ഡിപ്ലോമ ഇൻ പ്ലാസ്റ്റിക്സ് ടെക്നോളജി: പത്താം ക്ലാസ് പാസായവർക്ക് അപേക്ഷിക്കാം. പ്രായ പരിധി 20 വയസ്.
2018 ജൂലൈ ഒന്നു വച്ചാണു പ്രായം കണക്കാക്കുന്നത്. ജൂലൈ ഒന്നിനാണ് സിപിടി ജെഇഇ. ജൂൺ 27 വരെ അപേക്ഷിക്കാം.ഓഗസ്റ്റ് ഒന്നിനു ക്ലാസുകൾ ആരംഭിക്കും. വെബ്സൈറ്റ്: www.cipetonline.com. ഹെൽപ് ലൈൻ: 044 24501039. കൊച്ചി സെന്ററിലെ ഫോണ് നമ്പർ: 0484 2547740.