എംഎസ്‌സി നഴ്സിംഗ് പ്രവേശന പരീക്ഷ
തിരുവനന്തപുരം : തിരുവനന്തപുരം, കോട്ടയം, കോഴിക്കോട്, ആലപ്പുഴ, തൃശൂർ എന്നീ സർക്കാർ നഴ്സിംഗ് കോളജുകളിലും സ്വാശ്രയ നഴ്സിംഗ് കോളജുകളിലെ സർക്കാർ സീറ്റുകളിലേക്കും താഴെ പറയുന്ന ബിരുദാനന്തര ബിരുദ നഴ്സിംഗ് (എംഎസ്‌സി നഴ്സിംഗ്) കോഴ്സുകളിലേക്കുള്ള പ്രവേശന പരീക്ഷക്ക് അപേക്ഷ ക്ഷണിച്ചു.
മെഡിക്കൽ സർജിക്കൽ നഴ്സിംഗ്, കമ്യൂണിറ്റി ഹെൽത്ത് നഴ്സിംഗ്, ചൈൽഡ് ഹെൽത്ത് നഴ്സിംഗ്, ഒബ്സ്റ്റട്രിക്സ് ആൻഡ് ഗൈനക്കോളജി നഴ്സിംഗ്, മെന്‍റൽ ഹെൽത്ത് നഴ്സിംഗ്.
വിദ്യാഭ്യാസ യോഗ്യത : ബിഎസ്‌സി നഴ്സിംഗ് റഗുലർ ബിരുദം അഥവാ ജനറൽ നഴ്സിംഗ് ആൻഡ് മിഡ്വൈഫറി കോഴ്‌സ് പൂർത്തിയാക്കിയതിനു ശേഷമുള്ള പോസ്റ്റ് ബേസിക് നഴ്സിംഗ് (റെഗുലർ) ബിരുദം.
കേരളത്തിനു പുറത്തുള്ള സർവകലാശാലകളിൽ നിന്നോ കല്പിത സർവകലാശാലകളിൽ നിന്നോ നഴ്സിംഗ് ബിരുദം നേടിയിട്ടുള്ളവർ കേരളത്തിലെ ഏതെങ്കിലും സർവകലാശാലയിൽ നിന്നുമുള്ള തുല്യതാ സർട്ടിഫിക്കറ്റ് കൗണ്‍സിലിംഗ് സമയത്ത് സമർപ്പിക്കണം.
സേവന പരിചയം : നഴ്സിംഗ് ബിരുദത്തിനും രജിസ്ട്രേഷനും ശേഷം നഴ്സിംഗ് സ്കൂൾ/കുറഞ്ഞത് 100 രോഗികളെ കിടത്തി ചികിത്സിക്കുവാൻ സൗകര്യമുള്ള ആശുപത്രി/കമ്യൂണിറ്റി ഹെൽത്ത് സെന്‍റർ എന്നിവയിലേതിലെങ്കിലും ഒരു വർഷത്തെ സേവന പരിചയം അല്ലെങ്കിൽ രജിസ്ട്രേഷനു ശേഷം ഒരു വർഷത്തെ ഇന്‍റേണ്‍ഷിപ്പ്/നിർബന്ധിത സർക്കാർ സേവനം പ്രവേശന പരീക്ഷയ്ക്ക് വേണ്ടി അപേക്ഷ ക്ഷണിച്ചുകൊണ്ടുള്ള വിജ്ഞാപന തീയതിയിൽ പൂർത്തിയാക്കിയിരിക്കണം.
അപേക്ഷ സമർപ്പിക്കേണ്ട വിധം : സർവീസ് വിഭാഗക്കാർ ഉൾപ്പെടെയുള്ള എല്ലാ അപേക്ഷകർക്കും www.cee.kerala.gov.in എന്ന പ്രവേശന പരീക്ഷാ കമ്മീഷണറുടെ വെബ്സൈറ്റിൽ ലഭ്യമാക്കിയിട്ടുള്ള പൊതു അപേക്ഷാഫോം ഉപയോഗിച്ച് ഇന്നു മുതൽ 26 വൈകുന്നേരം അഞ്ച് വരെ ഓണ്‍ലൈനായി അപേക്ഷകൾ സമർപ്പിക്കാം.
സർവീസ് വിഭാഗത്തിലുള്ളവരുടെ അപേക്ഷകൾ ഓണ്‍ലൈനായി അപേക്ഷ സമർപ്പിക്കുന്നതിന് പുറമെ അപേക്ഷയുടെ പ്രിന്‍റൗട്ട് രേഖകൾ സഹിതം 26ന് വൈകുന്നേരം അഞ്ചിനു മുന്പ് അവരുടെ കണ്ട്രോളിംഗ് ഓഫീസർക്ക് സമർപ്പിക്കണം. ഫോണ് : 04712339101, 102, 103, 104, 2332123.