ബൈക്കിലെത്തിയ പത്തംഗസംഘം പെട്രോള്‍ പമ്പില്‍ അഴിഞ്ഞാടി |

കാട്ടാക്കട: ബൈക്കിലെത്തിയ 10 അംഗ സംഘം പെട്രോള്‍ പമ്പില്‍ ആക്രമണം നടത്തി. ബാലരാമപുരം- കാട്ടാക്കട റോഡില്‍ ഊരൂട്ടമ്പലത്ത് പ്രവര്‍ത്തിക്കുന്ന പെട്രോള്‍ പമ്പില്‍ ഞായറാഴ്ച രാത്രിയിലാണ് സംഘം ആക്രമണം നടത്തിയത്. ആക്രമണത്തില്‍ പമ്പിലെ ജീവനക്കാരില്‍ ആറോളം പേര്‍ക്ക് സാരമായി മര്‍ദനമേറ്റു.

അതിനിടെ പ്രതികൾക്കായി പോലീസ് അന്വേഷണം ഊർജിതമാക്കി. പ്രതികളെക്കുറിച്ച് സൂചന കിട്ടിയതായി പോലീസ് പറയുന്നു. സിസിടിവി ദൃശ്യങ്ങൾ അടക്കം പരിശോധിക്കുന്നു. പത്തംഗ സംഘം അഞ്ച് ബൈക്കുകളിലാണ് എത്തിയത്. ഇതില്‍ മൂന്ന് ബൈക്കുകളില്‍ 50 രൂപയ്ക്ക് പെട്രോള്‍ നിറയ്ക്കാന്‍ നിര്‍ദേശിച്ചു.

ജീവനക്കാരന്‍ പെട്രോള്‍ നിറച്ച ശേഷം രൂപ ആവശ്യപ്പെട്ടപ്പോള്‍ ഓണ്‍ലൈനായി അടയ്ക്കാമെന്ന് അറിയിച്ചു. സ്‌കാനര്‍ വഴി പണം അടച്ചെന്ന് വന്ന യുവാക്കള്‍ അറിയിച്ചെങ്കിലും അക്കൗണ്ടില്‍ പണം എത്തിയിരുന്നില്ല. പണം എത്തിയില്ലന്ന് ജീവനക്കാര്‍ വീണ്ടും അറിയച്ചതോടെയാണ് യുവാക്കള്‍ പ്രതികരിച്ചത്. ഉടന്‍ ബൈക്കില്‍ നിന്നിറങ്ങിയ ഒരു യുവാവ് ജീവനക്കാരനെ മര്‍ദിക്കുയായിരുന്നു.

തുടര്‍ന്ന് മറ്റ് ജീവനക്കാര്‍ കൂട്ടമായി എത്തിയതോടെ ബൈക്കിലുണ്ടായിരുന്ന ബാക്കിയുള്ളവർ ഇറങ്ങി ജീവനക്കാരെ ആക്രമിക്കുകയും പെട്രോള്‍ നിറയ്ക്കുന്നതിനുവേണ്ടി നിര്‍ത്തിയിട്ടിരുന്ന മറ്റ് വാഹനങ്ങള്‍ക്ക് കേടുപാട് വരുത്തുകയും ചെയ്തു.

തുടര്‍ന്ന് ആക്രോശിച്ച് യുവാക്കള്‍ കേസ് കൊടുക്കാന്‍ പമ്പുടമയോട് നിര്‍ദ്ദേശിച്ചു. കേസ് കൊടുത്താല്‍ രണ്ട് മാസം കഴിഞ്ഞ് വന്ന് പമ്പ് കത്തിക്കുമെന്ന് ഭീഷണിപ്പെടുത്തിയ ശേഷമാണ് സംഘങ്ങള്‍ മടങ്ങിയത്. മാറനല്ലൂര്‍ പോലീസ് സംഭവ സ്ഥലത്ത് എത്തിയപ്പോഴേക്കും സംഘം‍ മടങ്ങിയിരുന്നു.

പോലീസ് പമ്പിലെ നിരീക്ഷണ കാമറകള്‍ പരിശോധിച്ച് അന്വേഷണം നടത്തി വരുന്നു. അടുത്തിടെയാണ് പേയാട്ട് പെട്രോൾ പമ്പിൽ കയറി ഇതേ തരത്തിൽ ആക്രമണം നടത്തിയത്. അതേസംഘമാണോ ആക്രമണത്തിന് പിന്നിലെന്ന് പോലീസ് അന്വേഷിച്ചു വരികയാണ്.