ചീഫ് മൗസർ റിപ്പോർട്ടിംഗ് സർ!

Thursday, November 23, 2017 4:36 AM IST

അബ്ഡൗണിലെ ലോറൻസ് കുറച്ചു ദിവസങ്ങളായി ടോം ആൻഡ് ജെറി കണ്ട് ചില മാരകതന്ത്രങ്ങളൊക്കെ പഠിച്ചുകൊണ്ടിരിക്കുകയാണ്. കിട്ടിയിരിക്കുന്ന പദവി അത്ര ചെറുതല്ലല്ലോ. ആരാണീ ലോറൻസ് എന്നല്ലേ. ജോർദാനിലെ ബ്രിട്ടീഷ് ഡെപ്യൂട്ടി അംബാസഡർ ലോറാ ഡോബൻ ദത്തെടുത്ത പൂച്ചയാണ്. കിട്ടിയിരിക്കുന്ന പദവി ഏതു പൂച്ചയും കൊതിച്ചു പോകുന്ന, ബ്രിട്ടീഷ് എംബസിയിലെ "ചീഫ് മൗസർ’ പദവിയും (എലിപിടിത്തം). എന്തുതന്നെയായാലും കിട്ടിയിരിക്കുന്നത് മിലിട്ടറി പദവിയാണ്. ഇതിനോടകം ട്വിറ്ററിലും ലോറൻസ് താരമായിക്കഴിഞ്ഞതിനാൽ, പിടിക്കേണ്ട മൗസുകളുടെ കൂട്ടത്തിൽ കന്പ്യൂട്ടറിന്‍റെ മൗസും ഉൾപ്പെടും.

എലിവേല കഴിഞ്ഞു ബാക്കിവരുന്ന സമയത്ത് ട്വിറ്ററിലെ തന്‍റെ 57,000 ഫോളോവേഴ്സിനു മുന്നിലും ലോറൻസിന് എത്തിയേ പറ്റൂ. ഈയിടെയായി തടിയാ വിളി കുറച്ചു കേൾക്കുന്നുമുണ്ട്. പദവി ഏറ്റെങ്കിലും ശത്രുക്കളുടെ കുറവുമൂലം മേലനങ്ങാൻ അവസരം കിട്ടുന്നില്ലത്രേ. ഒന്നാം ലോകമഹായുദ്ധകാലത്ത് അറബ് രാജ്യങ്ങളെ തുണച്ച് ഒട്ടോമൻ ചക്രവർത്തിയോടു യുദ്ധം ചെയ്ത ബ്രിട്ടീഷ് മിലിട്ടറി ഓഫീസർ ടി.ഇ. ലോറൻസിന്‍റെ ഓർമയ്ക്കായാണ് ചീഫ് മൗസർക്ക് ലോറൻസ് എന്നു പേരിട്ടത്. നാട്ടിലുള്ള സകലമാന പൂച്ചകളുടെയും ’മുറുമുറുപ്പ്’ അസൂയാദികൾ ശ്രദ്ധിക്കാതെ ലോറൻസ് വിലസുകയാണ്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.