ഇനി കൈകൾ രണ്ടല്ല, നാല്..!

Thursday, November 30, 2017 2:20 AM IST

രണ്ടു കൈകൊണ്ടു അധ്വാനിച്ചിട്ടും ജോലികൾ തീരാതെ നാലുകൈകൾ ഉണ്ടായിരുന്നെങ്കിൽ എന്നു ചിന്തിച്ചിട്ടുണ്ടോ? എങ്കിൽ അതു യാഥാർഥ്യമാകുന്നു, കൃത്രിമക്കൈകളാണെന്നു മാത്രം. ഒരു ഇറ്റാലിയൻ റോബോട്ടിക് കന്പനിയായ യുബയോണിക് ആണ് ഈ കൃത്രിമക്കൈകളുടെ നിർമാതാക്കൾ. ബയോണിക് സാങ്കേതികവിദ്യയുടെ നിർണായക കുതിപ്പാണ് ഇതെന്നു കന്പനി അവകാശപ്പെട്ടു.

ഒരു കൈത്തണ്ടയിൽ സമാന്തരമായി രണ്ടു യന്ത്രക്കൈപ്പത്തികൾ ഘടിപ്പിച്ചാണ് ഇതു നിർമിച്ചിരിക്കുന്നത്. മനുഷ്യകരങ്ങളുടേതിനു സമാനമായ ചലനശേഷിയാണ് ഈ കൃത്രിമക്കൈകൾക്കുള്ളത്. 3ഡി പ്രിന്‍റിംഗ് ടെക്നോളജിയിലൂടെ നിർമിച്ചിരിക്കുന്ന ഈ ഉപകരണം രൂപകൽപന ചെയ്തത് യുബയോണിക് സിഇഒ ഫെഡറിക്കോ സിക്കാറീസ് ആണ്. നൈലോണ്‍ ഡസ്റ്റ് ഉപയോഗിച്ചു നിർമിച്ചിരിക്കുന്ന ഈ കൈ ആർഡിനോ മൈക്രോ കണ്‍ട്രോളർ, ഇലക്‌ട്രോഡുകൾ എന്നിവയുടെ സഹായത്താലാണു പ്രവർത്തിക്കുന്നത്.

തലച്ചോറിൽനിന്നു തരംഗങ്ങൾ സ്വീകരിച്ചു ന്യൂറോണുകൾ പേശീചലനങ്ങളെ നിയന്ത്രിക്കുന്നതുപോലെ തന്നെയാണ് യുബയോണിക് കൈകളുടെയും പ്രവർത്തനം. തലച്ചോറിൽനിന്നു വരുന്ന സിഗ്നലുകളെ സെൻസറുകൾ തിരിച്ചറിയുകയും മൈക്രോകണ്‍ട്രോളറുകൾക്കു നൽകുകയുമാണു ചെയ്യുന്നത്. ബയോണിക് കൈകളുടെ പ്രവർത്തനം അടങ്ങിയ വീഡിയോ യുബയോണിക് വെബ്സൈറ്റുകളിൽ ലഭ്യമാണ്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.