കണ്ണൂരിൽനിന്ന് കൂടുതൽ രാജ്യാന്തര സർവീസുമായി എയർ ഇന്ത്യ : Deepika.com Kerala News |

Click here for detailed news of all items

കണ്ണൂരിൽനിന്ന് കൂടുതൽ രാജ്യാന്തര സർവീസുമായി എയർ ഇന്ത്യ

Friday, May 3, 2024 12:44 AM IST

മട്ടന്നൂർ: കണ്ണൂർ രാജ്യാന്തര വിമാനത്താവളത്തിൽനിന്നു കൂടുതൽ രാജ്യാന്തര സർവീസുകളുമായി ഇന്ത്യയിലെ പ്രധാന വിമാന കമ്പനിയായ എയർ ഇന്ത്യ എക്സ്പ്രസ് യുഎഇയിലെ റാസൽഖൈമയിലേക്കു പുതിയ സർവീസ് തുടങ്ങി. ആഴ്ചയിൽ മൂന്നു സർവീസുകളാണ് നടത്തുന്നത്. ചൊവ്വ, ബുധൻ, വെള്ളി ദിവസങ്ങളിലാണു സർവീസുകൾ.

റാസൽ ഖൈമയിലേക്കുള്ള ആദ്യ വിമാന സർവീസിലെ യാത്രക്കാരിയെ കിയാൽ മാനേജിംഗ് ഡയറക്ടർ ദിനേശ് കുമാർ ബോർഡിംഗ് പാസ് നല്കി സ്വീകരിച്ചു.

വിമാന കമ്പനി അധികൃതരും കിയാൽ അധികൃതരും ചേർന്നു യാത്രക്കാർക്ക് മധുരം നല്കി യാത്രാ മംഗളങ്ങൾ നേർന്നു. റാസൽഖൈമയിലേക്കുള്ള കണക്ടിവിറ്റി വടക്കൻ മലബാർ മേഖലയിലെ പ്രവാസികൾക്ക് വലിയ ആശ്വാസമാണ് നൽകുന്നത്.

ആദ്യ വിമാനത്തിൽ 186 യാത്രക്കാരാണ് യാത്ര ചെയ്തത്. സൗദി അറേബ്യയിലെ ദമാം വിമാനത്താവളത്തിലേക്കും എയർ ഇന്ത്യ എക്സ്പ്രസ് പുതിയതായി കണ്ണൂരിൽനിന്നും സർവീസ് ആരംഭിച്ചു. മേയ്‌ രണ്ടു മുതൽ വ്യാഴം, വെള്ളി, ശനി ദിവസങ്ങളിൽ ആഴ്ചയിൽ മൂന്നു സർവീസുകളാണുള്ളത്. ഇത് കൂടാതെ അബുദാബിയിലേക്കും മസ്കറ്റിലേക്കും ഈ മാസം മുതൽ സർവീസുകൾ ആരംഭിക്കുന്നുണ്ട്.

ഏറ്റവും ആധുനികവും പുതിയതുമായ ബോയിംഗ് 737 മാക്സ് വിമാനങ്ങളാണ് എയർ ഇന്ത്യ എക്സ്പ്രസ് പുതിയ സർവീസുകൾക്കായി ഉപയോഗിക്കുന്നത്.
കിയാലുമായി ഉണ്ടാക്കിയ കരാർ പ്രകാരം എയർ ഇന്ത്യ എക്സ്പ്രസ് കൂടുതൽ വിമാനത്താവളങ്ങളിലേക്ക് കണ്ണൂരിൽനിന്നു സർവീസ് തുടങ്ങാൻ പദ്ധതിയിട്ടുണ്ട്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.