കണ്ണൂരിലും തളിപ്പറന്പിലും ഡ്രൈവിംഗ് ടെസ്റ്റ് നടന്നില്ല : Deepika.com Kerala News |

Click here for detailed news of all items

കണ്ണൂരിലും തളിപ്പറന്പിലും ഡ്രൈവിംഗ് ടെസ്റ്റ് നടന്നില്ല

Friday, May 3, 2024 5:21 AM IST

കണ്ണൂർ: പുതുക്കിയ നിബന്ധന പ്രകാരമുള്ള ഡ്രൈവിംഗ് ടെസ്റ്റ് കണ്ണൂരിലും തളിപ്പറന്പിലും നടന്നില്ല.

ഇന്നലെ രാവിലെ ടെസ്റ്റിനായി ഗ്രൗണ്ടിലെത്തിയ വാഹനങ്ങൾക്കൊന്നുംതന്നെ സർക്കാരിന്‍റെ പുതുക്കിയ നിബന്ധനകളനുസരിച്ചുള്ള സംവിധാനമില്ലാത്തതായിരുന്നു ടെസ്റ്റ് മുടങ്ങാൻ കാരണം. റോഡ് ടെസ്റ്റ് നടത്തുന്ന വാഹനങ്ങളിൽ കാമറകൾ സ്ഥാപിക്കണമെന്നായിരുന്നു നിർദേശം. എന്നാൽ ഡ്രൈവിംഗ് സ്കൂൾ ഉടമകൾ ഇതിനു തയാറല്ല.

ഡ്രൈവിംഗ് സ്കൂളുകളുടെ മുഴുവൻ വാഹനങ്ങളിലും ഇത്തരത്തിൽ കാമറകൾ സ്ഥാപിക്കാനുള്ള സാന്പത്തിക ഭദ്രത തങ്ങൾക്കില്ലെന്നും ഇതിനു പകരം ടെസ്റ്റ് നടക്കുന്ന വാഹനത്തിലിരിക്കുന്ന ഉദ്യോഗസ്ഥൻ കാമറയിൽ ടെസ്റ്റ് റിക്കാർഡ് ചെയ്യുന്ന രീതി അവലംബിക്കണമെന്നും ഡ്രൈവിംഗ് സ്കൂളുകാരുടെ സംഘടനയായ ഓൾ കേരള മോട്ടോർ ഡ്രൈവിംഗ് സ്കൂൾ ഇൻസ്ട്രക്ടേഴ്സ് ആൻഡ് വർക്കേഴ്സ് അസോസിയേഷൻ ആവശ്യപ്പെട്ടു.

പോലീസിൽ ഇത്തരത്തിൽ പോലീസുകാർതന്നെ വീഡിയോ ഷൂട്ട് ചെയ്യുന്ന സംവിധാനം നിലനിൽക്കുന്നുണ്ടെന്നും ഇത് മോട്ടോർവാഹന വകുപ്പിലും നടപ്പാക്കി ഡ്രൈവിംഗ് ടെസ്റ്റ് സുഗമമാക്കണമെന്നും അവർ ആവശ്യപ്പെട്ടു.

ടെസ്റ്റ് നടത്താൻ ആധുനിക ഡ്രൈവിംഗ് ടെസ്റ്റ് വേണമെന്ന സർക്കാർ നിലപാടിനോട് എതിർപ്പില്ലെങ്കിലും ഗ്രൗണ്ട് സർക്കാർ തയാറാക്കുന്നതിനു പകരം ഡ്രൈവിംഗ് സ്കൂൾ അധികൃതരുടെ ബാധ്യതയാക്കി മാറ്റുന്ന നിലപാട് അംഗീകരിക്കാനാകില്ല. 120 ടെസ്റ്റ് നടത്തിയത് പകുതിയായി വെട്ടിച്ചുരുക്കുന്നതിനു പകരം കൂടുതൽ ഉദ്യോഗസ്ഥരെ നിയോഗിച്ച് പഴയ രീതിയിൽ ടെസ്റ്റ് നടത്തണമെന്നും അസോസിയേഷൻ ആവശ്യപ്പെട്ടു.

പുതുക്കിയ സർക്കുലർ പിൻവലിക്കുക, ഡ്രൈവിംഗ് സ്കൂളുകളെ സംരക്ഷിക്കുക എന്ന ആവശ്യവുമായി ഓൾ കേരള മോട്ടോർ ഡ്രൈവിംഗ് സ്കൂൾ ഇൻസ്ട്രക്‌ടേഴ്സ് ആൻഡ് വർക്കേഴ്സ് അസോസിഷൻ ഇന്നലെ കരിദിനം ആചരിച്ചു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.