സീറോമലബാർ സഭാകാര്യാലയത്തിൽ പുതിയ നിയമനങ്ങൾ : Deepika.com Kerala News |

Click here for detailed news of all items

സീറോമലബാർ സഭാകാര്യാലയത്തിൽ പുതിയ നിയമനങ്ങൾ

Tuesday, May 7, 2024 1:14 AM IST

കൊച്ചി: സീറോമലബാർ സഭയുടെ മേജർ ആർക്കിഎപ്പിസ്കോപ്പൽ ഓർഡിനറി ട്രൈബ്യൂണലിന്‍റെ പ്രസിഡന്‍റായും വിശുദ്ധരുടെ നാമകരണ നടപടികൾക്കായുള്ള പോസ്റ്റുലേറ്റർ ജനറലായും കല്യാൺ രൂപതാംഗമായ ഫാ. ഫ്രാൻസിസ് എലുവത്തിങ്കൽ നിയമിതനായി. ഈ ചുമതലകൾ വഹിച്ചിരുന്ന ഫാ. തോമസ് ആദോപ്പിള്ളിൽ കോട്ടയം അതിരൂപതയുടെ ജുഡീഷൽ വികാരിയായും ചാൻസലറായും നിയമിതനായി.

സീറോമലബാർ മിഷൻ, സുവിശേഷവത്കരണത്തിനും പ്രവാസികളുടെ അജപാലന ശുശ്രൂഷയ്ക്കുമായുമായുള്ള കമ്മീഷൻ, ദളിത് വികാസ് സൊസൈറ്റി എന്നിവയുടെ സെക്രട്ടറിയായും ഫാ. ഫ്രാൻസിസ് എലുവത്തിങ്കൽ പ്രവർത്തിക്കും.

എംഎസ്ടി വൈദികൻ ഫാ. സിജു അഴകത്താണ് കഴിഞ്ഞ ആറു വർഷങ്ങളായി ഈ ശുശ്രൂഷകൾ നിർവഹിച്ചിരുന്നത്. 1995ൽ പൗരോഹിത്യം സ്വീകരിച്ച ഫാ. എലുവത്തിങ്കൽ തൃശൂർ അതിരൂപതയിലെ ചൊവ്വൂർ ഇടവകാംഗമാണ്. കല്യാൺ, ഷംഷാബാദ് രൂപതകളുടെ വികാരി ജനറൽ, ജുഡീഷൽ വികാരി, ചാൻസലർ എന്നീ ചുമതലകൾ നിർവഹിച്ചിട്ടുണ്ട്.

സഭാകാര്യാലയത്തിൽ സേവനം പൂർത്തിയാക്കിയ ചങ്ങനാശേരി അതിരൂപതാംഗം ഫാ. ജോർജ് മഠത്തിപ്പറമ്പിലിന് യാത്രയയപ്പ് നൽകി. അപ്പലേറ്റ് സേഫ് എൻ‌വയോൺമെന്‍റ് കമ്മിറ്റിയുടെ ചെയർപേഴ്സണായി വടവാതൂർ പൗരസ്ത്യ വിദ്യാപീഠത്തിലെ അധ്യാപകനായ ഫാ. ജോർജ് തെക്കേക്കരയെയും കമ്മിറ്റി അംഗമായി ഫാ. ജെയിംസ് തലച്ചെല്ലൂരിനെയും നിയമിച്ചു. മേജർ ആർക്കിഎപ്പിസ്കോപ്പൽ കൂരിയയുടെ ഫിനാൻസ് ഓഫീസർ പാലാ രൂപതാംഗമായ ഫാ. ജോസഫ് തോലാനിക്കലിനെ അഞ്ചു വർഷത്തേക്ക് പുനർനിയമിച്ചു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.