വെസ് പെയ്‌സ് ഓര്‍മയായി : Deepika.com Sports News |

Click here for detailed news of all items

വെസ് പെയ്‌സ് ഓര്‍മയായി

Friday, August 15, 2025 1:46 AM IST

കോല്‍ക്കത്ത: 1972 മ്യൂണിക് ഒളിമ്പിക്‌സില്‍ വെങ്കലം നേടിയ ഇന്ത്യന്‍ ഹോക്കി ടീം അംഗവും 1996 ഒളിമ്പിക്‌സില്‍ വെങ്കലം നേടിയ ടെന്നീസ് താരം ലിയാന്‍ഡര്‍ പെയ്‌സിന്‍റെ പിതാവുമായ ഡോ. വെസ് പെയ്‌സ് (80) അന്തരിച്ചു. വാര്‍ധക്യസഹജമായ അസുഖങ്ങളെത്തുടര്‍ന്ന് ഏറെനാളായി ചികിത്സയിലായിരുന്നു.

ഇന്ത്യന്‍ ബാസ്‌കറ്റ്‌ബോള്‍ ടീം മുന്‍ ക്യാപ്റ്റനായ ജെന്നിഫറാണ് ഭാര്യ. 1945ല്‍ ഗോവയിലായിരുന്നു വെസ് പെയ്‌സിന്‍റെ ജനനം.

ഡോക്ടര്‍ സ്‌പോര്‍ട്‌സ്

ക്രിക്കറ്റ്, ഫുട്‌ബോള്‍, റഗ്ബി തുടങ്ങിയ കായിക ഇനങ്ങളിലും വെസ് പെയ്‌സ് തന്‍റെ കഴിവു തെളിയിച്ചിരുന്നു. 13 വര്‍ഷം മോഹന്‍ ബഗാനുവേണ്ടി കളിച്ചു. 1968 ഒളിമ്പിക്‌സിനുള്ള ഇന്ത്യന്‍ ടീമില്‍ ഇടം ലഭിക്കേണ്ടതായിരുന്നെങ്കിലും അതുണ്ടായില്ല.

എംബിബിഎസ്, മാസ്റ്റര്‍ ഓഫ് സര്‍ജറി ബിരുദങ്ങളുള്ള വെസ് പെയ്‌സ്, ഓള്‍ ഇന്ത്യ ടെന്നീസ് അസോസിയേഷന്‍, ഇന്ത്യന്‍ ഫുട്‌ബോള്‍ അസോസിയേഷന്‍ എന്നിവിടങ്ങളില്‍ മെഡിക്കല്‍ കണ്‍സള്‍ട്ടന്‍റ് ആയിരുന്നു. ഇന്ത്യന്‍ ഒളിമ്പിക് അസോസിയേഷന് ഒപ്പവും ഇന്ത്യയുടെ ഡേവിസ് കപ്പ് ടെന്നീസ് ടീമിനൊപ്പവും ഡോക്ടറിന്‍റെ ചുമതല വഹിച്ചു.

ഏഷ്യയിലെ 18 രാജ്യങ്ങളില്‍ സ്‌പോര്‍ട്‌സ് മെഡിസിന്‍ പ്രോഗ്രാമുകള്‍ വളര്‍ത്തി. ഏഷ്യന്‍ ക്രിക്കറ്റ് കൗണ്‍സിലിനൊപ്പവും (എസിസി) പ്രവര്‍ത്തിച്ചു. ഉത്തേജക വിരുദ്ധ പ്രവര്‍ത്തനങ്ങളിലും വെസ് പെയ്സ് മുന്‍പന്തിയിലുണ്ടായിരുന്നു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.