അവസരങ്ങളുടെ കാര്യത്തിൽ മറ്റേതൊരു പ്രഫഷണൽ കോഴ്സിനും പുറകിലല്ല നിയമ രംഗം. ഇന്‍റലക്ച്വൽ പ്രോപ്പർട്ടി, ലീഗൽ റിസർച്ച്, സൈബർ ലോ, കോർപറേറ്റ് അഡ്വൈസറി, ജുഡീഷറി, ടാക് സേഷേൻ, ലീഗൽ ജേണലിസം എന്നിങ്ങനെ വ്യത്യസ്ത തൊഴിൽ മേഖലകളിൽ നിയമബിരുദധാരികൾക്ക് അവസരങ്ങളുണ്ട്. അഭിഭാഷകനാവുക മാത്രമല്ല കൺസട്ടൻസി, ഗവേഷണം, അധ്യാപനം എന്നിങ്ങനെ നിയമ ബിരുദധാരിയുടെ മുമ്പിൽ വൈവിധ്യമാർന്ന തൊഴിൽ സാധ്യതകളുണ്ട് .
പ്ലസ് ടുവിനു ശേഷമുള്ള അഞ്ചു വർഷം ദൈർഘ്യമുള്ള എൽഎൽബി കോഴ്സുകൾ, ഡിഗ്രിക്കു ശേഷം ചേരാവുന്ന ത്രിവത്സര എൽഎൽബി കോഴ്സുകൾ എന്നിങ്ങനെ രണ്ടുതരം നിയമ പ്രോഗ്രാമുകളുണ്ട്. ത്രിവത്സര കോഴ്സുകളെ അപേക്ഷിച്ച് പഞ്ചവത്സര കോഴ്സുകൾക്കാണ് ഇന്ന് പ്രിയം.NLSIU ബംഗളൂരു, NALSAR ഹൈദരാബാദ് തുടങ്ങി രാജ്യത്തെ 23 ദേശീയ നിയമ സർവകലാശാലകളിലും പഞ്ചവത്സര കോഴ്സുകളാണുള്ളത്. National Law University (NLU ) ഡൽഹി യൊഴിച്ചുള്ള എല്ലാ ദേശീയ നിയമ സർവകലാശാലയിലും പ്രവേശനം Common Law Admission Test (CLAT )വഴിയാണ് . All India Law Entrance Test ( AlLET ) വഴിയാണ് NLU വിലെ പ്രവേശനം.
സിംബയോസിസ് ലോ സ്ക്കൂൾ, ജിൻഡാൽ ലോ സ്കൂൾ , NMIMS School of Law , Govt Law College Mumbai, ILS Pune, Nirma Institute of Law, BHU Law School, Christ University Law School എന്നിവയാണ് രാജ്യത്തെ മറ്റ് മികച്ച നിയമ പഠന കേന്ദ്രങ്ങൾ . ഓരോ സ്ഥാപനത്തിനും പ്രത്യേകം പ്രവേശന പരീക്ഷകളുമുണ്ട്. ഐഐഎം റോത്തക്ക് ഈ വർഷം മുതൽ പഞ്ചവത്സര LLB പ്രോഗ്രാം ആരംഭിച്ചിട്ടുണ്ട്. പ്രവേശനം CLAT വഴിയാണ്.
CLAT ആണ് ഏറ്റവും പ്രധാനപ്പെട്ട നിയമ പ്രവേശന പരീക്ഷ .2021ൽ 75,183 പേരാണ് പരീക്ഷയ്ക്ക് പേക്ഷിച്ചത്. LLB കോഴ്സിനുള്ള പ്രവേശന പരീക്ഷകളിൽ പൊതുവെ GK, Verbal Ability, Logical Reasoning, Elementary Mathematics, Legal Reasoning എന്നീ വിഭാഗങ്ങളിൽ നിന്നുള്ള ചോദ്യങ്ങളാണ് ഉണ്ടാവുക.
ഡൽഹി സർവകലാശാല ത്രിവത്സര എൽഎൽബി കോഴ്സാണ് നടത്തി വരുന്നത്. CUSAT ഉൾപ്പടെ കേരളത്തിലെ സർവകലാശാലകളിലും ബനാറസ് ഹിന്ദു യൂണിവേഴ്സിറ്റിയിലും മറ്റ് നിരവധി കോളേജുകളിലും പഞ്ചവത്സര കോഴ്സുകളും ത്രിവത്സര കോഴ്സുകളുമുണ്ട്.
അലിഗഡ് മുസ്‌ലീം യൂണിവേഴ്സിറ്റിയുടെ അലിഗഡ് കാമ്പസിലും മലപ്പുറം കാമ്പസിലും ജാമിയ മിലിയ ഇസ്‌ലാമിയ ഡൽഹിയിലും പഞ്ചവത്സര നിയമ കോഴ്സുകളാണുള്ളത്.
JMI, AMU,BHU എന്നീ മൂന്ന് കേന്ദ്ര സർവകലാശാലകളിലേക്കുള്ള പ്രവേശനം അവ പ്രത്യേകം നടത്തുന്ന പ്രവേശന പരീക്ഷകൾ വഴിയാണ്.
കേരളത്തിൽ
കൊച്ചിൻ യൂണിവേഴ്സിറ്റിയിലും (പ്രവേശനം CUSAT CAT വഴി) തിരുവനന്തപുരം, കൊച്ചി, തൃശൂർ, കോഴിക്കോട് ലോ കോളജുകളിലും പഞ്ചവത്സര ബിരുദ പ്രോഗ്രാമുകളും ത്രിവത്സര ബിരുദ കോഴ്സുകളും നടത്തി വരുന്നു. നിരവധി സ്വകാര്യ കോളജുകളിലും ത്രിവത്സര / പഞ്ചവത്സര നിയമ കോഴ്സുകളുണ്ട്. സംസ്ഥാന പ്രവേശന പരീക്ഷാ കമ്മീഷണർ നടത്തുന്ന KLEE (Kerala Law Entrance Examination) വഴിയാണ് ഈ പ്രോഗ്രാമുകളിലേക്കുള്ള പ്രവേശനം. എംജി യൂണിവേഴ്സിറ്റിയിലും കണ്ണൂർ യൂണിവേഴ്സിറ്റിയിലും നടത്തുന്ന LLB കോഴ്സുകൾക്ക് പ്രത്യേകം എൻട്രൻസ് പരീക്ഷകളുണ്ട്.
നിയമ കോഴ്സിന് ചേരാൻ പ്രായപരിധിയില്ല. ഏത് സ്ട്രീം പഠിച്ചവർക്കും പ്രവേശനം ലഭിക്കുകയും ചെയ്യും. ശരിയാംവണ്ണം തയ്യാറെടുപ്പുകൾ നടത്തുന്നവർക്ക് നിയമ പഠനം ഒരു കിട്ടാക്കനിയല്ല. ഉയർന്ന റാങ്കുള്ളവർക്കേ മികച്ച സ്ഥാപനങ്ങളിൽ പ്രവേശനം നേടാൻ കഴിയൂ . അതിന് തീവ്രമായ പരിശീലനവും വേണം.
NLSUI പോലുള്ള ദേശീയ നിയമ സർവകലാശാലകളിൽ നിന്നും LLB പൂർത്തിയാക്കുന്നവർക്ക് മികച്ച കാമ്പസ് പ്ലേയ്സ്മെന്‍റ് സാധ്യതകളുണ്ട്.
Amar chand Mangaldas, Khaitan and Co,
AZB and partners, Trilegal,J Sagar Associates,
Luthra and Luthra, തുടങ്ങിയ പ്രശസ്ത നിയമ സ്ഥാപനങ്ങൾ ഈ കാമ്പസുകളിൽ റിക്രൂട്ട്മെന്‍റിനെത്തുന്നു. പ്രതിമാസം ഒരു ലക്ഷം രൂപയിലുമധികമാണ് പ്രാരംഭ ശമ്പളം.
ത്രിവത്സര LLB കോഴ്സുകളിൽ Delhi University, BHU, GLC Mumbai, ILS Pune,National Law University, Jindal Law School എന്നിവ നടത്തുന്ന LLB പ്രോഗ്രാമുകൾ ഉന്നത നിലവാരം പുലർത്തുന്നു. IIT ഖൊരഖ്‌പൂരിൽ ഇന്‍റലക്ച്വൽ പ്രോപ്പർട്ടി റൈറ്റ്സ് സ്പെഷലൈസേഷനോടു കൂടെയുള്ള ത്രിവത്സര LLB കോഴ്സ് നടത്തി വരുന്നു.
B.Tech കാർക്കും MSc/ M. Pharm/ MBA ബിരുദധാരികൾക്കും മാത്രമാണ് പ്രവേശനം.
LLB പൂർത്തിയാക്കിയവർക്ക് മാസ്റ്റേഴ്സ് ബിരുദത്തിന് (LLM) ശ്രമിക്കാം. മാസ്റ്റേഴ്സ് തലത്തിൽ സിവിൽ ലോ, ടാക്സ് ലോ, ഇന്‍റലക്ച്വൽ പ്രോപ്പർട്ടി റൈറ്റ്സ് എന്നിങ്ങനെ വിവിധ വിഷയങ്ങളിൽ സ്പെഷലൈസേഷൻ നടത്താം.
Corporate Governance, Cyber Law, Public Policy, Medical Law and Ethics എന്നിങ്ങനെ
അനുബന്ധ വിഷയങ്ങളിലും നിയമ സർവകലാശാലകളിൽ കോഴ്സുകൾ ലഭ്യമാണ്. ഐ ഐഐടി അലഹബാദിലെ MS സൈബർലോ & ഇൻഫർമേഷൻ സെക്യൂരിറ്റി സവിശേഷമായ മറ്റൊരു പ്രോഗ്രാമാണ്.
റിട്ടയർമെന്‍റ് ആവശ്യമില്ലാത്ത തൊഴിലാണ് വക്കീലിന്‍റേത്. ബാർകൗൺസിലിൽ എൻറോൾ ചെയ്ത അഭിഭാഷകന് സുപ്രീം കോടതിയിലോ ഹൈക്കോടതിയിലോ കീഴ്കോടതികളിലോ പ്രാക്ടീസ് ചെയ്യാം. എൽഎൽബിക്കു ശേഷം എഴുത്തുപരീക്ഷ വഴി നേരിട്ട് ജഡ്ജ് നിയമനം നേടാം. അഭിഭാഷക വൃത്തിയിൽ കഴിവു തെളിയിച്ചവരെ നേരിട്ട് ഹൈക്കോടതി ജഡ്ജ് പദവിയിലേക്ക് പരിഗണിക്കുകയും ചെയ്യും.
വിവിധ കോർപറേറ്റ് സ്ഥാപനങ്ങളുടെ ലീഗൽ അഡ്വൈസർ പദവി, ബാങ്ക് സ്പെഷ്യലിസ്റ്റ് ഓഫീസർ (Law) എന്നിവയെല്ലാം മികച്ച തൊഴിൽ സാധ്യതകളാണ്. നിയമ ബിരുദധാരികൾക്ക് ശ്രമിക്കാവുന്ന മറ്റൊരു മേഖലയാണ് സിവിൽ സർവീസസ്. എൽഎൽബി പഠനത്തിനു ശേഷം എൽഎൽഎം പൂർത്തിയാക്കി കോളജുകളിൽ അധ്യാപകരാവാനും അവസരമുണ്ട്. വിവിധ സർവകലാശാലകളിൽ ഗവേഷണത്തിനുള്ള സൗകര്യങ്ങളുമുണ്ട്.
Adwise Career Consulting, Thrissur
Ph: 9400 610 478