സൗത്ത് ഇന്ത്യൻ ബാങ്കിൽ കുട്ടികൾക്കായി സവിശേഷ സേവിംഗ്സ് അക്കൗണ്ട് : Deepika.com Business News |

കൊച്ചി: കുട്ടികളിൽ സന്പാദ്യ ശീലം പരിപോഷിപ്പിക്കുന്നതിനും അവരെ സാന്പത്തിക സാക്ഷരരാക്കുന്നതിനും ലക്ഷ്യമിട്ട് ശിശുദിനത്തോടനുബന്ധിച്ച് സൗത്ത് ഇന്ത്യൻ ബാങ്ക് കുട്ടികൾക്കായി കിഡ്സ് സേവിംഗ്സ് അക്കൗണ്ട് അവതരിപ്പിച്ചു.

എസ്ഐബി ജൻ നെക്സ്റ്റ് കിഡ്സ് സേവിംഗ്സ് അക്കൗണ്ട് മുഖേന രക്ഷിതാക്കൾക്ക് തങ്ങളുടെ കുട്ടികളുടെ ഭാവിലക്ഷ്യങ്ങൾക്കു വേണ്ടി പണം സ്വരൂപിക്കാനും നിരീക്ഷിക്കാനും കഴിയും. കുട്ടികൾക്ക് 18 വയസ് തികയുന്നതുവരെ ഈ അക്കൗണ്ടിൽ രക്ഷിതാക്കൾക്കു നിക്ഷേപിക്കാം. പത്തു വയസു പൂർത്തിയായാൽ കുട്ടികൾക്കും സ്വന്തമായി ഈ അക്കൗണ്ട് പ്രവർത്തിപ്പിക്കാം. രക്ഷിതാക്കളുടെ അക്കൗണ്ടുമായി ബന്ധിപ്പിക്കാനും തടസങ്ങളില്ലാതെ നിക്ഷേപിക്കുന്നതിന് ഓട്ടോ ഡെബിറ്റ് സൗകര്യവും ലഭ്യമാണ്. കുട്ടികളുടെ ഭാവി സുരക്ഷിതമാക്കുന്നതിന് നിരവധി സവിശേഷതകളും ഈ അക്കൗണ്ടിനുണ്ട്. സൗത്ത് ഇന്ത്യൻ ബാങ്കിന്‍റെ എല്ലാ ശാഖകളിലും നിലവിലെ ഉപഭോക്താക്കൾക്കും പുതിയ ഉപഭോക്താക്കൾക്കും ഈ സേവനം ഇപ്പോൾ ലഭ്യമാണ്.

’ജനസംഖ്യയിൽ ഏറ്റവും പ്രായംകുറഞ്ഞവർ ഏറെയുള്ള രാജ്യമാണ് ഇന്ത്യ. ചെറിയ പ്രായത്തിൽ തന്നെ കുട്ടികളെ സാന്പത്തിക അച്ചടക്കത്തെക്കുറിച്ചും സന്പാദ്യത്തെ കുറിച്ചു ബോധവൽക്കരിക്കേണ്ടത് ആവശ്യമാണ്. സന്പാദ്യശീലം വളർത്താനും ചെലവുകൾ വിവേകപൂർവമാക്കാനും ഇത് അവരെ സഹായിക്കും,’ സൗത്ത് ഇന്ത്യൻ ബാങ്ക് എക്സിക്യൂട്ടീവ് വൈസ് പ്രസിഡന്‍റും ഗ്രൂപ്പ് ബിസിനസ് ഹെഡുമായ തോമസ് ജോസഫ് കെ പറഞ്ഞു.

കിഡ്സ് അക്കൗണ്ടിന്‍റെ സവിശേഷതകൾ

• കുട്ടികളുടെ ജനനത്തോടെ രക്ഷിതാക്കൾക്ക് അക്കൗണ്ട് തുറക്കാനും ഉടനടി പ്രവർത്തിപ്പിക്കാനും കഴിയും.

• രക്ഷിതാക്കളുടെ വ്യക്തിഗത അക്കൗണ്ടിൽ പ്രതിമാസം ശരാശരി 10000 രൂപ ബാലൻസ് നിലനിർത്തുന്നുണ്ടെങ്കിൽ കിഡ്സ് അക്കൗണ്ടിൽ നിശ്ചിത തുക ബാലൻസ് നിർബന്ധമില്ല.

• രക്ഷിതാക്കളുടെ അനുമതിയോടെ കിഡ്സ് അക്കൗണ്ടിലെ നിക്ഷേപം പ്രത്യേക ചാർജുകളൊന്നുമില്ലാതെ ട്രാൻസ്ഫർ ചെയ്യാം.

• കിഡ്സ് സേവിംഗ്സ് അക്കൗണ്ട് രക്ഷിതാക്കൾക്ക് എസ്ഐബി മിറർ പ്ലസ് ആപ്പിലൂടെ നിരീക്ഷിക്കാം

• ടാപ് ആന്‍റ് പേ സംവിധാനമുള്ള കോണ്ടാക്ടലെസ് ഡെബിറ്റ് കാർഡും എസ്ഐബി ജൻ നെക്സ്റ്റ് അക്കൗണ്ടിനൊപ്പം ലഭിക്കും

• ഇ-ലോക്ക് ഫീച്ചർ വഴി രക്ഷിതാക്കൾക്ക് ഒറ്റ ക്ലിക്കിലൂടെ കുട്ടികളുടെ അക്കൗണ്ട് സുരക്ഷിതമാക്കാം.