കൊടുങ്ങല്ലൂർ: കേരളത്തിൽ മുഖ്യമന്ത്രി ചർച്ച ശക്തമായിരിക്കെ കൊടുങ്ങല്ലൂരിലും വി.ഡി. സതീശൻ അനുകൂല പ്രകടനം. യുഡിഎഫിനെ വിജയത്തിലേക്ക് നയിച്ച വി.ഡി സതീശൻ തന്നെ ആകണം കേരളത്തിന്റെ മുഖ്യമന്ത്രിയെന്ന് ആവശ്യപ്പെട്ട് മുദ്രവാക്യം വിളിയുമായി നൂറുകണക്കിന് കോൺഗ്രസ് പ്രവർത്തകർ നഗരത്തിൽ കൂറ്റൻ പ്രകടനം നടത്തി. "പട നയിച്ചവർ നാടു ഭരിക്കട്ടെ; ജനഹിതം അട്ടിമറിക്കരുത്'എന്ന് എഴുതിയ ബാനറിൽ സ്ത്രീകൾ ഉൾപ്പെടെയുള്ള പ്രവർത്തകർ അണിനിരന്നു.
വടക്കേനടയിൽ നിന്നും ആരംഭിച്ച പ്രകടനം നഗരംചുറ്റി വടക്കേനടയിൽത്തന്നെ സമാപിച്ചു. കോൺഗ്രസ് പ്രവർത്തകരുടെ വാട്ട്സ്ആപ്പ് ഗ്രൂപ്പിൽ ഇട്ട മെസേജിനെ തുടർന്നാണ് പ്രവർത്തകർ വി.ഡി. സതീശന് പിന്തുണയുമായി പ്രകടനത്തിന് നഗരത്തിൽ എത്തിയതെന്ന് പ്രവർത്തകർ പറഞ്ഞു. എറിയാട് ബ്ലോക്ക് വൈസ് പ്രസിഡന്റ് ഇ.കെ. സോമൻ മാസ്റ്റർ, കൊടുങ്ങല്ലൂർ ബ്ലോക്ക് വൈസ് പ്രസിഡന്റ് കെ. പി. സുനിൽകുമാർ, വി.എം. ഷൈൻ, ഇസാബിൻ അബ്ദുൾ കരീം, അയൂബ് കരുപ്പടന്ന തുടങ്ങിയ നേതാക്കൾ നേതൃത്വം നൽകി.