തിരുവനന്തപുരം: കോണ്ഗ്രസ് മത്സരിക്കുന്ന തിരുവനന്തപുരം മണ്ഡലത്തിൽ ഘടകകക്ഷിയായ സിഎംപിയുടെ നേതാവ് സി.പി. ജോണിനെ മത്സരരംഗത്ത് ഇറക്കാനുള്ള തീരുമാനത്തിനെതിരേ ഒരു വിഭാഗം കോണ്ഗ്രസ് നേതാക്കൾ.
തിരുവനന്തപുരം മണ്ഡലം സി.പി. ജോണിനു നൽകാനുള്ള തീരുമാനം ഉപേക്ഷിക്കണമെന്നാവശ്യപ്പെട്ടു മണ്ഡലത്തിലെ ജില്ലാതല നേതാക്കൾ, ബ്ലോക്ക്, മണ്ഡലം ഭാരവാഹികൾ ഒപ്പിട്ട നിവേദനം സംസ്ഥാന നേതൃത്വത്തിനു കൈമാറി.
യുഡിഎഫിലെ പ്രധാന ഘടകകക്ഷിയായ സിഎംപിയുടെ ജനറൽ സെക്രട്ടറി സി.പി. ജോണിന് തിരുവനന്തപുരമോ തിരുവന്പാടിയോ സീറ്റ് നൽകാനായിരുന്നു സംസ്ഥാന നേതാക്കളുടെ താത്പര്യം.
തിരുവനന്തപുരത്ത് സി.പി. ജോണ് നിശബ്ദ പ്രചാരണവും തുടങ്ങിയിരുന്നു. ഈ ഘട്ടത്തിലാണ് ഒരു വിഭാഗം കോണ്ഗ്രസ് നേതാക്കൾ തീരുമാനത്തിനെതിരേ രംഗത്തെത്തിയത്.
ജില്ലയിലെ മുതിർന്ന നേതാക്കളായ വി.എസ്. ശിവകുമാർ, ടി. ശരത്ചന്ദ്രപ്രസാദ് തുടങ്ങിയ നേതാക്കൾ ഇവിടെ സ്ഥാനാർഥിത്വം ആഗ്രഹിച്ചിരുന്നു.