ന്യൂഡൽഹി: ദേശീയതലത്തിൽ ഇന്ത്യാ സഖ്യത്തിലെ കക്ഷികൾ പരസ്പരം പോരടിക്കുന്ന സാഹചര്യം ഒഴിവാക്കണമെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി. സംസ്ഥാനതലത്തിൽ സഖ്യകക്ഷികൾക്കിടയിൽ അഭിപ്രായവ്യത്യാസങ്ങൾ സ്വാഭാവികമാണ്. എന്നാൽ അവ ദേശീയതലത്തിൽ പ്രതിഫലിക്കരുതെന്നും രാഹുൽ ഗാന്ധി പറഞ്ഞു.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ പ്രതിഷേധപരിപാടികൾ ചർച്ച ചെയ്യാൻ ചേർന്ന ഇന്ത്യാ സഖ്യ യോഗത്തിലാണ് രാഹുൽ ഗാന്ധിയുടെ പരാമർശം. സഖ്യകക്ഷികളുടെ പരസ്യമായ ഏറ്റുമുട്ടലുകൾ ബിജെപി രാഷ്ട്രീയമായി ഉപയോഗിക്കുമെന്നും അദ്ദേഹം ചൂണ്ടിക്കാട്ടി. ഗ്യാനേഷ് കുമാറിനെതിരായ പ്രതിഷേധത്തിൽ രാഷ്ട്രീയ പാർട്ടികൾക്കൊപ്പം പൊതുസമൂഹത്തെയും അണിനിരത്തണമെന്ന എം.എ. ബേബിയുടെ നിർദേശത്തെ മമത ബാനർജി പിന്തുണ അറിയിച്ചു.
ജനാധിപത്യ സംരക്ഷണത്തിനായി എല്ലാവരും ഒരുമിച്ച് നിൽക്കണമെന്നും തനിക്ക് ഈഗോ ഇല്ലെന്നും മമത യോഗത്തിൽ വ്യക്തമാക്കി. ഇടതുപാർട്ടികളുമായി സഹകരിച്ച് പൊതുസമൂഹത്തെയും ആക്ടിവിസ്റ്റുകളെയും പ്രതിഷേധത്തിന്റെ ഭാഗമാക്കണമെന്ന ആവശ്യവും യോഗത്തിൽ ഉയർന്നു. സിപിഎം ജനറൽ സെക്രട്ടറി എം.എ. ബേബി തനിക്ക് കത്തയച്ചതായും അതിന് മറുപടി നൽകിയതായും മമത ബാനർജി യോഗത്തെ അറിയിച്ചു.
സിപിഎം ഉൾപ്പെടെയുള്ള ഇടതുപാർട്ടികളുമായി സഹകരിച്ച് പ്രവർത്തിക്കാൻ തയാറാണെന്ന നിലപാട് ഇന്ത്യാ സഖ്യ യോഗത്തിൽ മമത ആദ്യമായി വ്യക്തമാക്കിയതായും നേതാക്കൾ അറിയിച്ചു. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനും തെരഞ്ഞെടുപ്പ് കമ്മീഷനുമെതിരേ സ്വീകരിക്കേണ്ട നിയമനടപടികളെക്കുറിച്ച് കപിൽ സിബൽ യോഗത്തിൽ വിശദീകരിച്ചു. സിബൽ മുന്നോട്ടുവച്ച ചില നിർദേശങ്ങൾ യോഗം അംഗീകരിച്ചു.