പരവൂര്: ഇന്ത്യന് റെയില്വേയുടെ അഭിമാനമായ വന്ദേ ഭാരത് എക്സ്പ്രസ് ട്രെയിനുകള് യാത്രക്കാരുടെ എണ്ണത്തില് പുതിയ റെക്കോര്ഡ് ഇട്ടു. സര്വീസ് ആരംഭിച്ചത് മുതല് ഇതുവരെ ഒരു ലക്ഷം ട്രിപ്പുകളിലായി 9.1 കോടിയിലധികം യാത്രക്കാര് വന്ദേ ഭാരതിനെ ആശ്രയിച്ചതായി റെയില്വേ മന്ത്രാലയം അറിയിച്ചു.
2025-26 സാമ്പത്തിക വര്ഷത്തില് മാത്രം 3.98 കോടി യാത്രക്കാരാണ് ഈ ട്രെയിനുകളില് സഞ്ചരിച്ചത്. കഴിഞ്ഞ വര്ഷത്തെ അപേക്ഷിച്ച് (2.97 കോടി) 34 ശതമാനത്തോളം വര്ധനയാണ് യാത്രക്കാരുടെ എണ്ണത്തിലുണ്ടായത്.
2019 ഫെബ്രുവരിയില് ന്യൂഡല്ഹി-വാരണാസി റൂട്ടില് തുടക്കമിട്ട വന്ദേ ഭാരത് ഇന്ന് രാജ്യം മുഴുവന് വ്യാപിച്ചിരിക്കുകയാണ്. 73 ലക്ഷം യാത്രക്കാര് സഞ്ചരിച്ച ന്യൂഡല്ഹി-വാരണാസി റൂട്ടാണ് ഇപ്പോഴും ഏറ്റവും തിരക്കേറിയതായി തുടരുന്നത്. ന്യൂഡല്ഹി-കത്ര റൂട്ടില് 56 ലക്ഷം പേരും ദക്ഷിണേന്ത്യയിലെ പ്രധാന റൂട്ടായ സെക്കന്തരാബാദ്-വിശാഖപട്ടണത്തില് 48 ലക്ഷം പേരും ചെന്നൈ-മൈസൂരു റൂട്ടില് 36 ലക്ഷം പേരും യാത്ര ചെയ്തു.
ദീര്ഘദൂര യാത്രയ്ക്കായി 2026 ജനുവരിയില് പശ്ചിമ ബംഗാളിനും അസമിനും ഇടയില് ആരംഭിച്ച വന്ദേ ഭാരത് സ്ലീപ്പര് സര്വീസിനും മികച്ച പ്രതികരണമാണ് ലഭിക്കുന്നത്. പ്രവര്ത്തനം തുടങ്ങി ആദ്യ മൂന്ന് മാസത്തിനുള്ളില് തന്നെ ഒരു ലക്ഷത്തിലധികം യാത്രക്കാര് സ്ലീപ്പര് സര്വീസ് പ്രയോജനപ്പെടുത്തി.
ഈ റൂട്ടില് 100 ശതമാനത്തിലധികം ഒക്യുപന്സി നിരക്ക് കൈവരിക്കാന് സാധിച്ചതായും റെയില്വേ അധികൃതര് വ്യക്തമാക്കി. ആധുനിക സൗകര്യങ്ങളും വേഗതയും വന്ദേ ഭാരതിനെ ഇന്ത്യയിലെ ഏറ്റവും ജനപ്രിയ ട്രെയിന് സര്വീസുകളിലൊന്നാക്കി മാറ്റിയിരിക്കുകയാണ്.
Deepika
E-paper LOGIN
LOGIN