ന്യൂയോർക്ക്: ഇന്ത്യൻ ഓവർസീസ് കോൺഗ്രസ് യുഎസ്എയുടെ നേതൃത്വത്തിൽ "Solidarity, Democracy, Justice' എന്ന സന്ദേശമുയർത്തി ന്യൂയോർക്കിൽ ഐക്യദാർഢ്യ സംഗമം സംഘടിപ്പിക്കുന്നു. ഞായറാഴ്ച വൈകുന്നേരം അഞ്ചിന് ന്യൂയോർക്ക് സിറ്റിയിലെ ടൈംസ് സ്ക്വയറിലാണ് (47th Street & 7th Avenue) പരിപാടി നടക്കുന്നത്.
ഇന്ത്യയിൽ നീറ്റ് ഉൾപ്പെടെയുള്ള വിവിധ മത്സരപരീക്ഷകളുടെ ചോദ്യപ്പേപ്പർ ചോർച്ച, മൂല്യനിർണയത്തിലെ ക്രമക്കേടുകൾ, ഇവയിൽ പ്രതിഷേധിച്ച് സമാധാനപരമായി സമരം ചെയ്ത വിദ്യാർഥികൾക്കും കോൺഗ്രസ് പ്രവർത്തകർക്കുമെതിരേ നടന്ന പോലീസ് അതിക്രമങ്ങൾ എന്നിവയ്ക്കെതിരേ ശക്തമായ പ്രതിഷേധം രേഖപ്പെടുത്താനാണ് ഈ സംഗമം ഒരുക്കുന്നത്.
രാഹുൽ ഗാന്ധി, പ്രിയങ്ക ഗാന്ധി ഉൾപ്പെടെയുള്ള നേതാക്കൾക്കെതിരായ പ്രതികാര നടപടികളിലും ജനാധിപത്യ ധ്വംസനത്തിലും പ്രതിഷേധം ഉയർത്തുമെന്ന് ഭാരവാഹികൾ അറിയിച്ചു. ജനാധിപത്യവും നീതിയും സംരക്ഷിക്കുന്നതിനായി ഏവരും ഒരുമിച്ച് അണിനിരക്കണമെന്ന് സംഘാടകർ ആഹ്വാനം ചെയ്തു.
ഐഒസി യുഎസ്എ വൈസ് ചെയർമാൻ ജോർജ് അബ്രഹാമിന്റെ നേതൃത്വത്തിൽ ന്യൂജഴ്സി, ന്യൂയോർക്ക്, കണക്ടിക്കട്ട്, പെൻസിൽവാനിയ ചാപ്റ്റർ പ്രവർത്തകരും അമേരിക്കയിലെ ഇന്ത്യൻ വിദ്യാർഥികളും പരിപാടിയിൽ പങ്കാളികളാകും.
കേരള ചാപ്റ്റർ പ്രസിഡന്റ് സതീശൻ നായർ, ചെയർമാൻ പോൾ കറുകപ്പള്ളിൽ, മുൻ പ്രസിഡന്റ് ലീല മാരേട്ട്, നാഷണൽ ജനറൽ സെക്രട്ടറിമാരായ രാജീവ് മോഹൻ, ജോസഫ് ഇടിക്കുള, സോഫിയ ശർമ, ന്യൂയോർക്ക് ചാപ്റ്റർ പ്രസിഡന്റുമാരായ നോഹ ജോർജ്, ഇമ്രാൻ പാഷ, ന്യൂജഴ്സി ചാപ്റ്റർ പ്രസിഡന്റ് ജെയിംസ് ജോർജ് എന്നിവരടക്കം നിരവധി നേതാക്കളും ഭാരവാഹികളും സംഗമത്തിന് നേതൃത്വം നൽകും.
കൂടുതൽ വിവരങ്ങൾക്ക്: സോഫിയ ശർമ (917-668-9999), ഇമ്രാൻ പാഷ (248-214-4668).
E-paper LOGIN
LOGIN
