കോന്നി: അട്ടച്ചാക്കല് - കുമ്പളാംപൊയ്ക റോഡിലെ ചെങ്ങറ, ചിറത്തിട്ട, ശ്രീപാര്വതി അമ്മന്കോവിലിനു സമീപം കാട്ടുപന്നി കുറുകെ ചാടിയതിനെ തുടര്ന്ന് നിയന്ത്രണംവിട്ട ഇലക്ട്രിക് കാര് റോഡരികിലെ കലുങ്കില് ഇടിച്ചു തീപിടിച്ചു. കാറില് ഉണ്ടായിരുന്ന യുവാവ് അത്ഭുതകരമായി രക്ഷപ്പെട്ടു. ഇന്നലെ പുലര്ച്ചെ 1:45നാണ് സംഭവം.
എറണാകുളത്തെ ജോലി സ്ഥലത്തുനിന്നും തേക്കുതോട്ടിലേക്ക് വരികയായിരുന്ന തേക്കുതോട് കുന്നംപള്ളില്, ജിബിന് കെ. ജെയിംസാണ് കാര് ഓടിച്ചിരുന്നത്. കാട്ടുപന്നി കുറുകെച്ചാടിയതിനെ തുടര്ന്ന് നിയന്ത്രണംവിട്ട കാര് റോഡരികിലെ കലുങ്ക് തകര്ത്ത് ഇടിച്ചുനില്ക്കുകയായിരുന്നു. കാറില് ജിബിന് മാത്രമാണ് ഉണ്ടായിരുന്നത്.
ജിബിന് പുറത്തിറങ്ങി മിനിറ്റുകള്ക്കുള്ളില് കാറില്നിന്ന് പുകയും തീയും ഉണ്ടാകുകയും കാര് പൂര്ണമായും കത്തി നശിക്കുകയുമായിരുന്നു. മലയാലപ്പുഴ ദേവീ ക്ഷേത്രത്തിലെ ഉത്സവം കഴിഞ്ഞ് റോഡിലൂടെ വന്നവര് കാര് കത്തുന്നതു കണ്ട് ഫയര്ഫോഴ്സില് വിവരം അറിയിക്കുകയായിരുന്നു. പത്തനംതിട്ടയില്നിന്നും കോന്നിയില്നിന്നും ഫയര്ഫോഴ്സിന്റെ രണ്ട് യൂണിറ്റുകള് എത്തിയാണ് തീയണച്ചത്. അപകടത്തിനു മുന്പ് മഴ പെയ്തിരുന്നതിനാല് സമീപത്തെ റബര് തോട്ടത്തിലേക്ക് തീ പടര്ന്നു പിടിച്ചില്ല.
പത്തനംതിട്ട ജില്ലയില് സമീപദിവസങ്ങളില് കാട്ടുപന്നിയുടെ ആക്രമണങ്ങളില് നിരവധി പേര്ക്കാണ് പരിക്കേറ്റത്. കാര് അപകടമുണ്ടായ ഇതേ റോഡില് കഴിഞ്ഞയാഴ്്ച ദമ്പതികളും മകളും സഞ്ചരിച്ച സ്കൂട്ടറില് കാട്ടുപന്നി ഇടിച്ച് അപകടത്തില്പെട്ടിരുന്നു. യാത്രക്കാരായ മൂവര്ക്കും ഗുരുതര പരിക്കേല്ക്കുകയുണ്ടായി.
Deepika
E-paper LOGIN
LOGIN
