ന്യൂഡല്ഹി: തുടര്ച്ചയായി ആറു ദിവസം ലോക്സഭ സ്തംഭിപ്പിച്ചശേഷം ഇന്നലെ ഉച്ചകഴിഞ്ഞ് സഭാ നടപടികളോട് പ്രതിപക്ഷം സഹകരിച്ചു.
സ്പീക്കര്ക്കെതിരേ അവിശ്വാസ പ്രമേയത്തിനു നോട്ടീസ് നല്കിയതോടെ സഭാ നടപടികളില് പങ്കെടുക്കണമെന്ന് പ്രതിപക്ഷകക്ഷികള് തീരുമാനിക്കുകയായിരുന്നു. തുടര്ന്ന് ഉച്ചകഴിഞ്ഞു നടന്ന ബജറ്റ് ചര്ച്ചയില് പ്രതിപക്ഷം പങ്കെടുത്തു.
കോണ്ഗ്രസിനുവേണ്ടി ശശി തരൂരാണ് ബജറ്റ് ചര്ച്ചയ്ക്ക് തുടക്കം കുറിച്ചത്. സമാജ്വാദി പാര്ട്ടിക്കുവേണ്ടി അഖിലേഷ് യാദവും തൃണമൂല് കോണ്ഗ്രസിനുവേണ്ടി അഭിഷേക് ബാനര്ജിയും ചര്ച്ചയില് പങ്കെടുത്തു.
ലോക്സഭാ പ്രതിപക്ഷനേതാവ് രാഹുല് ഗാന്ധി ഇന്നു സംസാരിക്കുമെന്ന് സൂചനയുണ്ടെങ്കിലും ഇക്കാര്യത്തില് പാര്ട്ടിവൃത്തങ്ങള് വ്യക്തത വരുത്തിയിട്ടില്ല.
കേന്ദ്ര ധനമന്ത്രി നിര്മല സീതാരാമന് ബജറ്റ് ചര്ച്ചയ്ക്ക് ഇന്ന് മറുപടി നല്കും. സഭാനടപടികളില് പങ്കെടുക്കണമെന്ന് പ്രതിപക്ഷാംഗങ്ങളില് ചിലര് അഭിപ്രായം പ്രകടിപ്പിച്ചതോടെയാണു സമ്മേളനത്തോടു സഹകരിക്കാമെന്ന പൊതുനിലപാട് പ്രതിപക്ഷം സ്വീകരിച്ചത്.
Deepika
E-paper LOGIN
LOGIN
