ആലപ്പുഴ: തദ്ദേശ തെരഞ്ഞെടുപ്പിൽ എല്ഡിഎഫ് വിമതയായി ജയിച്ച അംഗത്തെ ചേപ്പാട് പഞ്ചായത്ത് പ്രസിഡന്റാക്കാനുള്ള നീക്കത്തിൽ സിപിഎമ്മിൽ പൊട്ടിത്തെറി. പാർട്ടിയുടെ നീക്കത്തിൽ പ്രതിഷേധിച്ച് ലോക്കല് കമ്മിറ്റി അംഗം ബിന്ദു രാജേന്ദ്രൻ രാജിവെച്ചു.
ചേപ്പാട് പടിഞ്ഞാറ് ലോക്കല് കമ്മിറ്റി അംഗവും പതിനാലാം വാര്ഡില്നിന്ന് വിജയിച്ച ആളുമാണ് ബിന്ദു. പാര്ട്ടിയുടെ പ്രാഥമിക അംഗത്വത്തില്നിന്ന് രാജിവച്ചെന്നും രാജിക്കത്ത് കാര്ത്തികപ്പള്ളി ഏരിയാ സെക്രട്ടറിക്ക് കൈമാറിയെന്നും ബിന്ദു പറഞ്ഞു.
പതിമൂന്നാം വാര്ഡില് റിബലായി മത്സരിക്കുകയും ഒരു ജാതിസംഘടനയുടെ വക്താവായി നിലകൊണ്ട് വിജയിക്കുകയും ചെയ്ത ടി.തുളസിയെ പഞ്ചായത്ത് പ്രസിഡന്റാക്കാനുള്ള നീക്കമാണ് നടക്കുന്നത്. ഇത് അംഗീകരിക്കാൻ കഴിയില്ലെന്നും രാജിക്കത്തിൽ പറയുന്നു.