കോട്ടയം: ടാപ്പര്ക്കു നല്കുന്ന ക്ഷേമനിധിയില് ചെറുകിട റബര് കര്ഷകരെയും ഉള്പ്പെടുത്തുന്നു. തോട്ടംതൊഴിലാളി ക്ഷേമനിധി പദ്ധതിയില് ഉള്പ്പെടുത്തിയാണ് റബര് ബോര്ഡ് പെന്ഷന് നടപ്പാക്കുന്നത്. ഇതനുസരിച്ച് 60 വയസ് പൂര്ത്തിയായ തൊഴിലാളിക്ക് 2,000 രൂപ പ്രതിമാസ പെന്ഷന് ലഭിക്കും.
തൊഴിലാളികള്ക്കും കുടുംബാംഗങ്ങള്ക്കും ചികിത്സയ്ക്ക് 10,000 മുതല് ഒരു ലക്ഷം രൂപ വരെ സാമ്പത്തികസഹായം ലഭ്യമാക്കുന്ന പദ്ധതി ഉള്പ്പെടെ നിരവധി ക്ഷേമപ്രവര്ത്തനങ്ങളും റബര് ബോര്ഡ് നടപ്പാക്കുന്നു.
വനിതാ തൊഴിലാളികള്ക്കും പെണ്മക്കള്ക്കും 25,000 രൂപയുടെ വിവാഹസഹായം, വനിതാ തൊഴിലാളികള്ക്ക് 15,000 രൂപ പ്രസവ ചികിത്സാസഹായം, മക്കള്ക്ക് ആറാം ക്ലാസ് മുതല് 1,500 രൂപ മുതല് 16,000 വരെ വിദ്യാഭ്യാസസഹായം എന്നിവയും ഹോസ്റ്റല് ഫീസായി 1,000 മുതല് 1,400 രൂപ വരെയും പ്രതിമാസം ലഭിക്കും. ഭവന നിര്മാണത്തിന് 50,000 രൂപ സഹായവും നല്കും.
ടാപ്പര്മാര്ക്ക് കണ്ണട വാങ്ങുന്നതിന് 2,000 രൂപയുടെ ധനസഹായവും ടാപ്പിംഗ് ജോലിക്കാര്ക്ക് ഗ്രൂപ്പ് ഇന്ഷ്വറന്സും പഴയ റബര് മരങ്ങള് നീക്കി പുതിയ മരങ്ങള് നടുന്നതിന് ഹെക്ടറിന് 40,000 രൂപ ധനസഹായവും ആര്പിഎസ് മുഖേന ചെറുകിട കര്ഷകര്ക്ക് ഹെക്ടറിന് 4,000 രൂപ റെയിന് ഗാര്ഡിംഗ് സഹായവും കര്ഷകര് ചേര്ന്നു റബര്പാല് ഷീറ്റാക്കി ഉണക്കാന് റബര്പാല് സംസ്കരണ കേന്ദ്രങ്ങള് തുടങ്ങാനും നവീകരിക്കാനും രണ്ടര ലക്ഷം രൂപ വരെ സഹായധനവും ലഭ്യമാക്കുമെന്ന് റബര് ബോര്ഡ് ചെയര്മാന് എന്. ഹരി പറഞ്ഞു.