കൊച്ചി: സംസ്ഥാനത്തെ ജ്വല്ലറികളില്‍ 18 കാരറ്റ് സ്വര്‍ണത്തിന് ഈടാക്കിയിരുന്ന വ്യത്യസ്ത വിലകള്‍ ഏകീകരിക്കാന്‍ തീരുമാനം.
കേരള ജ്വല്ലേഴ്‌സ് അസോസിയേഷന്‍ കോ ഓര്‍ഡിനേഷന്‍ കമ്മിറ്റിയുടെ നേതൃത്വത്തില്‍ സംസ്ഥാനത്തെ വിവിധ സ്വര്‍ണ വ്യാപാര സംഘടനകളുടെ കൂട്ടായ തീരുമാനപ്രകാരമാണ് ഏകീകൃത വിലനിര്‍ണയ സംവിധാനം നടപ്പാക്കുന്നത്. പുതുക്കിയ നിരക്ക് ഇന്നുമുതല്‍ പ്രാബല്യത്തില്‍ വരും.
22 കാരറ്റ് സ്വര്‍ണത്തിനു വില നിശ്ചയിക്കുന്ന ആനുപാതിക മാനദണ്ഡം അടിസ്ഥാനമാക്കിയായിരിക്കും 18 കാരറ്റ് സ്വര്‍ണത്തിന്‍റെയും വില നിശ്ചയിക്കുക. ഇതോടെ സംസ്ഥാനത്തെ ജ്വല്ലറികളില്‍ 18 കാരറ്റ് സ്വര്‍ണത്തിനു വ്യത്യസ്ത നിരക്കുകള്‍ ഈടാക്കുന്ന സാഹചര്യം ഒഴിവാക്കാനും വിലനിര്‍ണയത്തില്‍ ഏകീകരണം ഉറപ്പാക്കാനും സാധിക്കുമെന്ന് കെജിഎസ്എംഎ സംസ്ഥാന ജനറല്‍ സെക്രട്ടറി അഡ്വ. എസ്. അബ്‌ദുൾ നാസര്‍ പറഞ്ഞു. സംസ്ഥാനത്തെ സ്വര്‍ണവ്യാപാര മേഖലയില്‍ വിലനിര്‍ണയത്തില്‍ കൂടുതല്‍ സുതാര്യതയും ഏകീകൃതസ്വഭാവവും ഉറപ്പാക്കുന്നതിന്‍റെ ഭാഗമായാണു തീരുമാനം.
കെജിഎസ്എംഎ സംസ്ഥാന പ്രസിഡന്‍റ് കെ. സുരേന്ദ്രന്‍ അധ്യക്ഷത വഹിച്ചു. കെജിഎസ്എംഎ ജനറല്‍ സെക്രട്ടറി അഡ്വ. എസ്. അബ്‌ദുൾ നാസര്‍, എകെജിഎസ്എംഎ ചെയര്‍മാന്‍ ഡോ. ബി. ഗോവിന്ദന്‍, രാജേഷ് കല്യാണ്‍, കേരള ജ്വല്ലറി ഫെഡറേഷന്‍ ജനറല്‍ സെക്രട്ടറി എം.പി. അഹമ്മദ്, രാജേഷ് കല്യാണ്‍, എ.കെ. നിഷാദ്, കെജിഎസ്ഡിഎ പ്രസിഡന്‍റ് ഷാജു ചിറയത്ത്, സുഹാസ് റാവു, കൃഷ്ണകുമാര്‍ ഉണ്ണി, ഷിനോ മാത്യു തുടങ്ങിയവരും യോഗത്തില്‍ പങ്കെടുത്തു.
Deepika
Corehub Solutions
E-paper LOGIN
LOGIN
