തിരുവനന്തപുരം: ശബരിമല തീർഥാടന ഒരുക്കങ്ങൾക്കും അനുബന്ധ ചെലവുകൾക്കുമായി ആറു ജില്ലകളിലെ തദ്ദേശ സ്ഥാപനങ്ങൾക്ക് 3.36 കോടി രൂപയുടെ സ്പെഷ്യൽ ഗ്രാന്റ് അനുവദിച്ചു ധനവകുപ്പ്. തീർഥാടന പാതകളിലെയും പ്രധാന ഇടത്താവളങ്ങളിലെയും അടിസ്ഥാന സൗകര്യങ്ങൾ മെച്ചപ്പെടുത്താനും ശുചീകരണ പ്രവർത്തനം കാര്യക്ഷമമാക്കാനുമാണ് ഫണ്ട് വിനിയോഗിക്കുക.
കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, തൃശൂർ ജില്ലകളിലെ തെരഞ്ഞെടുക്കപ്പെട്ട തദ്ദേശ സ്ഥാപനങ്ങൾക്കാണ് തുക അനുവദിച്ചത്. ജില്ലകളിലെ 38 ഗ്രാമപഞ്ചായത്തുകൾക്കായി 2.31 കോടി രൂപയും ഒൻപത് നഗരസഭകൾക്ക് 1.05 കോടിയും വകയിരുത്തി തദ്ദേശ വകുപ്പ് ഉത്തരവിറക്കി. നടപ്പു സാന്പത്തിക വർഷത്തെ ബജറ്റ് വിഹിതത്തിൽ നിന്നാണ് തുക അനുവദിച്ചത്. തദ്ദേശ സ്ഥാപനങ്ങളുടെ ആവശ്യകത, മുൻവർഷങ്ങളിലെ ഫണ്ട് വിനിയോഗം, നിലവിൽ ലഭ്യമായ നീക്കിയിരിപ്പ് എന്നിവ വിലയിരുത്തി തുക അടിയന്തരമായി വിതരണം ചെയ്യാൻ തദ്ദേശ വകുപ്പ് പ്രിൻസിപ്പൽ ഡയറക്ടർക്ക് സർക്കാർ നിർദ്ദേശം നൽകി.
അനുവദിച്ച ഗ്രാന്റ് ശബരിമല തീർഥാടനവുമായി ബന്ധപ്പെട്ട അടിസ്ഥാന സൗകര്യ വികസനത്തിനും ശുചീകരണ പ്രവർത്തനങ്ങൾക്കും തീർഥാടന അനുബന്ധ ചെലവുകൾക്കും മാത്രമേ ഉപയോഗിക്കുന്നുള്ളൂവെന്ന് അതത് ഗ്രാമപഞ്ചായത്ത്- നഗരസഭാ സെക്രട്ടറിമാർ ഉറപ്പുവരുത്തണം. തുക ചെലവഴിച്ച ശേഷം വകുപ്പ് തലവന് ധനവിനിയോഗ സാക്ഷ്യപത്രം സമർപ്പിക്കണം. ഫണ്ട് വിനിയോഗം പെർഫോമൻസ് ഓഡിറ്റ് വിഭാഗവും സംസ്ഥാന ഓഡിറ്റ് വകുപ്പും പ്രത്യേകം പരിശോധിക്കുമെന്നും ഉത്തരവിൽ പറയുന്നു.