അങ്കമാലി: ടെൽക്കിൽനിന്നു വിജയകരമായി നിർമാണം പൂർത്തിയാക്കിയ 315 എംവിഎ ശേഷിയുള്ള അത്യാധുനിക 400/132/33 കെവി ഓട്ടോ ട്രാൻസ്ഫോർമർ ആന്ധ്രാപ്രദേശ് ട്രാൻസ്മിഷൻ കോർപറേഷനായ അപ്ട്രാൻസ്കോയ്ക്ക് അയച്ച് നിർണായക നേട്ടം കൈവരിച്ചു. ഇവർക്കുവേണ്ടി നിർമിക്കുന്ന രണ്ട് ട്രാൻസ്ഫോർമറുകളിൽ ആദ്യത്തേതാണ് ഐനവില്ലി സബ്സ്റ്റേഷനിലേക്ക് അയച്ചത്. ഇന്നലെ ഉച്ചകഴിഞ്ഞ് നടന്ന ഫ്ലാഗ് ഓഫ് ചടങ്ങിൽ ടെൽക് മാനേജിംഗ് ഡയറക്ടർ പി. കെ.ജെനയാണ് അപ്ട്രാൻസ്കോ പ്രതിനിധി കെ. രാജ്കുമാറിന് ഈ പദ്ധതിയുടെ കൈമാറ്റം നടത്തിയത്.
ഇതിന് 40.90 കോടി രൂപയാണ് ജിഎസ്ടി ഒഴികെയുള്ള ആകെ കരാർ മൂല്യം. ഓയിൽ സർക്കുലേഷൻ പമ്പുകളുടെ സഹായമില്ലാതെ പ്രവർത്തിക്കുന്ന ഒനാൻ /ഒഎൻഎഎഫ് 1/ഒഎൻഎഎഫ് 2 കൂളിംഗ് സംവിധാനം ഈ ട്രാൻസ്ഫോർമറിന്റെ പ്രധാന സവിശേഷതയാണ്. ഊർജനഷ്ടം കുറയ്ക്കുന്നതിനും കൂളിംഗ് കാര്യക്ഷമത വർധിപ്പിക്കുന്നതിനുമായി നൂതന സാങ്കേതിക മാറ്റങ്ങളും രൂപകൽപ്പനയിൽ ഉൾപ്പെടുത്തിയിട്ടുണ്ട്.
ഏകദേശം 205 ടൺ ഭാരമുള്ള ട്രാൻസ്ഫോർമർ അഴിച്ചുമാറ്റാതെ തന്നെ ലോഡ് ചെയ്ത് അയച്ചത് ടെൽക് ട്രാൻസ്ഫോർമർ നിർമാണ ചരിത്രത്തിലെ ആദ്യ നേട്ടമാണ്. ലിഫ്റ്റിംഗ് സൗകര്യങ്ങളുടെ പരിമിതികൾക്കിടയിലും സുരക്ഷയിലും ഗുണനിലവാരത്തിലും വിട്ടുവീഴ്ചയില്ലാതെയാണ് ഈ ദൗത്യം പൂർത്തിയാക്കിയതെന്ന് അധികൃതർ അറിയിച്ചു.