വാഷിംഗ്ടൺ ഡിസി: സാങ്കേതിക തകരാറിനെത്തുടർന്ന് അമേരിക്കയിൽ വ്യോമഗതാഗതം താറുമാറായി. 2001 സെപ്റ്റംബർ 11ലെ ഭീകരാക്രമണത്തിനുശേഷമുള്ള ഏറ്റവും വലിയ വ്യോമഗതാഗത പ്രതിസന്ധിയാണിത്.
വെള്ളിയാഴ്ച ഫെഡറൽ ഏവിയേഷൻ അഡ്മിനിസ്ട്രേഷൻ രാജ്യവ്യാപകമായി അഞ്ചു മണിക്കൂറോളം വിമാന സർവീസുകൾ നിർത്തിവച്ചതോടെ ആയിരക്കണക്കിനു യാത്രക്കാർ വിമാനത്താവളങ്ങളിൽ കുടുങ്ങി. വെള്ളിയാഴ്ചയും ഇന്നലെയുമായി പതിനായിരത്തോളം വിമാനങ്ങൾ റദ്ദാക്കുകയും നിരവധി സർവീസുകൾ വൈകുകയും ചെയ്തു.
എയർ ട്രാഫിക് കൺട്രോൾ സംവിധാനത്തിലെ കാലഹരണപ്പെട്ട ഉപകരണങ്ങളും റഡാർ, റേഡിയോ ആശയവിനിമയ ശൃംഖലകളിലുണ്ടായ തകരാറുമാണ് പ്രതിസന്ധിക്കു കാരണമായത്.
പൈലറ്റുമാരുമായി ബന്ധപ്പെടാൻ കഴിയാത്ത സാഹചര്യം വിമാനങ്ങളുടെ സുരക്ഷയെ ബാധിക്കുമെന്നതിനാൽ സർവീസുകൾ നിർത്തിവയ്ക്കാൻ അധികൃതർ തീരുമാനിക്കുകയായിരുന്നു. സൈബർ ആക്രമണമോ നിർമിതബുദ്ധിയുമായി ബന്ധപ്പെട്ട തകരാറോ ഉണ്ടായതിനു തെളിവില്ലെന്ന് ആഭ്യന്തര സുരക്ഷാ അധികൃതർ വ്യക്തമാക്കി.
വെള്ളിയാഴ്ച രാത്രിയോടെ നിയന്ത്രണം പിൻവലിച്ചെങ്കിലും ഇന്നലെയും 3,700ലേറെ വിമാനങ്ങൾ റദ്ദാക്കുകയും 2000ത്തിലധികം സർവീസുകൾ വൈകുകയും ചെയ്തു. വിമാനത്താവളങ്ങളിലെ തിരക്കും ജീവനക്കാരുടെ ലഭ്യതക്കുറവും പ്രതിസന്ധി നീണ്ടുപോകാൻ കാരണമായി.
വ്യോമഗതാഗത സംവിധാനം പൂർണമായി നവീകരിക്കാൻ 5,000 കോടി ഡോളർ അടിയന്തരമായി അനുവദിക്കണമെന്ന് ഗതാഗത സെക്രട്ടറി ഷോൺ ഡഫി കോൺഗ്രസിനോട് ആവശ്യപ്പെട്ടു. അതേസമയം, പ്രതിസന്ധിയെത്തുടർന്ന് പ്രമുഖ വിമാനക്കമ്പനികളുടെ ഓഹരിമൂല്യത്തിലും ഇടിവുണ്ടായി. എഫ്എഎയുടെ സാങ്കേതിക തകരാർ മൂലമുണ്ടായ യാത്രാതടസങ്ങൾക്കു വിമാനക്കമ്പനികൾ നഷ്‌ടപരിഹാരം നൽകേണ്ടതില്ലെന്നതും യാത്രക്കാരുടെ ദുരിതം വർധിപ്പിച്ചു.
രാജ്യത്തെ എയർ ട്രാഫിക് കൺട്രോൾ സംവിധാനത്തിൽ പുതിയ സാങ്കേതികവിദ്യ കൂട്ടിച്ചേർത്തപ്പോൾ പഴയ ഉപകരണങ്ങൾക്ക് അതു താങ്ങാനാകാതെ വന്നതാണ് പ്രതിസന്ധിക്കു കാരണമായതെന്ന് ട്രംപ് ഭരണകൂടത്തിലെ ഉദ്യോഗസ്ഥർ അറിയിച്ചു.
Deepika
Corehub Solutions
E-paper LOGIN
LOGIN
