ചൈനീസ് നിർമ്മിത ഫുൾ ബോഡി എയർബാഗ് ഹെൽമെറ്റിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുമ്പോൾ, അതിന്റെ ആധികാരികത സംബന്ധിച്ച് വലിയ ചർച്ചകളാണ് ഉയരുന്നത്. ബൈക്ക് യാത്രയ്ക്കിടെ അപകടത്തിൽപ്പെടുന്ന യാത്രികനെ പൊതിഞ്ഞുരക്ഷിക്കുന്ന രീതിയിലുള്ള ഈ ഹെൽമെറ്റ് സാങ്കേതികവിദ്യ ആധുനിക കാറുകളിലെ സുരക്ഷാ സംവിധാനങ്ങളെ ഓർമ്മിപ്പിക്കുന്നതാണ്. ദൃശ്യങ്ങളുടെ കൗതുകം കാരണം ലക്ഷക്കണക്കിന് ആളുകളാണ് ഈ ദൃശ്യങ്ങൾ ഇതിനോടകം പങ്കുവെച്ചിട്ടുള്ളത്.
ഈ നൂതന ഉൽപ്പന്നത്തിന് പിന്നിൽ ലാൻക്സി യെമ മോട്ടോർസൈക്കിൾ ഫിറ്റിംഗ്സ്, യാൻഫെങ് ഓട്ടോമോട്ടീവ് എന്നീ ചൈനീസ് കമ്പനികളാണെന്ന തരത്തിൽ അഭ്യൂഹങ്ങൾ പരക്കുന്നുണ്ടെങ്കിലും, കമ്പനികളുടെ ഭാഗത്തുനിന്ന് യാതൊരുവിധ ഔദ്യോഗിക സ്ഥിരീകരണവും ഉണ്ടായിട്ടില്ല. സെജിയാങ് ആസ്ഥാനമായി പ്രവർത്തിക്കുന്ന പ്രമുഖ ഹെൽമെറ്റ് നിർമ്മാതാക്കളായ ലാൻക്സിയോ എയർബാഗ് സാങ്കേതികവിദ്യയുള്ള ഇത്തരമൊരു ഉൽപ്പന്നത്തെക്കുറിച്ച് ഇതുവരെ പ്രതികരിച്ചിട്ടില്ല. കാറുകളുടെ സുരക്ഷാ ഉപകരണങ്ങൾ നിർമ്മിക്കുന്ന യാൻഫെങ് കമ്പനിയുടെ ഔദ്യോഗിക വിവരങ്ങളിലും ഇതിനെക്കുറിച്ച് പരാമർശങ്ങളില്ല.
കൂടാതെ, വൈറൽ ദൃശ്യങ്ങളിൽ കാണുന്ന ചില പൊരുത്തക്കേടുകളും സംശയങ്ങൾക്ക് ആക്കം കൂട്ടുന്നുണ്ട്. ചൈനീസ് ബ്രാൻഡുകൾക്ക് പകരം പ്രശസ്ത ഇറ്റാലിയൻ നിർമ്മാതാക്കളായ എജിവിയുടെ ലോഗോ പതിച്ച ഹെൽമെറ്റും, ഡെയ്നീസിന്റെ ലെതർ സ്യൂട്ടുമാണ് യാത്രികൻ ധരിച്ചിരിക്കുന്നത്. ഈ ഉൽപ്പന്നവുമായി ബന്ധപ്പെട്ട ഔദ്യോഗിക പ്രഖ്യാപനങ്ങളോ സർട്ടിഫിക്കേഷനുകളോ നിലവിൽ ലഭ്യമല്ല.
ഇത്തരം ദൃശ്യങ്ങൾ ആർട്ടിഫിഷ്യൽ ഇന്റലിജൻസിന്റെ സഹായത്തോടെ നിർമ്മിച്ചതാണെന്ന അഭിപ്രായമാണ് സോഷ്യൽ മീഡിയ പങ്കുവെക്കുന്നത്. അതേസമയം, ഇരുചക്ര വാഹന യാത്രികർക്കായി എയർബാഗ് വെസ്റ്റുകളും ജാക്കറ്റുകളും യാഥാർഥ്യമായിക്കഴിഞ്ഞിട്ടുണ്ട്. 2022-ൽ ഇറ്റാലിയൻ കമ്പനിയായ ഐറോയും സ്വീഡിഷ് സ്ഥാപനമായ ഓട്ടോലിവും ചേർന്ന് സമാനമായൊരു പ്രോട്ടോടൈപ്പ് അവതരിപ്പിച്ചിരുന്നെങ്കിലും, നിലവിലുള്ള ഈ വൈറൽ ദൃശ്യങ്ങൾക്ക് അതിലേക്ക് യാതൊരുവിധ ബന്ധവുമില്ലെന്ന് വ്യക്തമാണ്.