പത്തനംതിട്ട: കേരളത്തിന്റെ ഡിജിറ്റൽ മുന്നേറ്റത്തിന് പുതിയ അധ്യായം കുറിച്ച അക്ഷയ പ്രസ്ഥാനം 25 വർഷം പൂർത്തിയാകുന്പോൾ, സേവനമികവിന്റെയും പുരസ്കാരങ്ങളുടെയും തിളക്കവുമായി ശ്രദ്ധേയനാകുകയാണ് പത്തനംതിട്ടയിലെ അക്ഷയ സംരംഭകനായ ടി.എ. ഷാജഹാൻ. കേരളത്തിൽ അക്ഷയ പ്രസ്ഥാനം തുടക്കം കുറിച്ചിട്ട് നാളെ 25 വർഷം പൂർത്തിയാകുകയാണ്. അക്ഷയയുടെ തുടക്കം മുതൽ ഡിജിറ്റൽ സേവനങ്ങൾ സാധാരണക്കാരിലേക്ക് എത്തിക്കുന്നതിൽ സജീവമായ ഷാജഹാൻ, അക്ഷയ മേഖലയിലെ പ്രവർത്തനമികവിലൂടെ സംസ്ഥാന, ദേശീയ തലങ്ങളിൽ നിരവധി അംഗീകാരങ്ങൾ നേടിയിട്ടുണ്ട്. സംസ്ഥാന സർക്കാരിന്റെ മികച്ച അക്ഷയ കേന്ദ്രത്തിനുള്ള ഇൻസ്റ്റിറ്റ്യൂട്ട് ഓഫ് മാനേജ്മെന്റ് ഇൻ ഗവൺമെന്റിന്റെ സംസ്ഥാന ഇ-ഗവേണൻസ് പുരസ്കാരം 2011 മുതൽ 2021 വരെയുള്ള കാലയളവിൽ തുടർച്ചയായി സ്വന്തമാക്കിയത് അദ്ദേഹത്തിന്റെ പ്രവർത്തനമികവിന് ലഭിച്ച വലിയ അംഗീകാരമാണ്. 2013ലും 2018ലും ദേശീയ ഇ-ഗവേണൻസ് പുരസ്കാരങ്ങളും മികച്ച സംരംഭകത്വത്തിനുള്ള അംഗീകാരങ്ങളും ഷാജഹാനു ലഭിച്ചിരുന്നു. 2012ൽ ബിഎസ്എൻഎൽ പുരസ്കാരവും ലഭിച്ചു. കൂടാതെ സ്കോച്ച് പുരസ്കാരം ഉൾപ്പെടെയുള്ള അംഗീകാരങ്ങളും അദ്ദേഹത്തിന്റെ നേട്ടങ്ങളുടെ പട്ടികയിലുണ്ട്.
പാസ്പോർട്ട് സേവനരംഗത്തും ഷാജഹാൻ ശ്രദ്ധേയമായ നേട്ടം കൈവരിച്ചിട്ടുണ്ട്. 2025-26 സാമ്പത്തിക വർഷത്തിൽ പാസ്പോർട്ട് സേവനത്തിൽ മികച്ച പ്രകടനത്തിനുള്ള പുരസ്കാരവും ലഭിച്ചു.
ജില്ലയിൽ ആദ്യമായി ബ്രാൻഡ് ചെയ്ത അക്ഷയ കേന്ദ്രമെന്ന പ്രത്യേകതയും സംസ്ഥാനത്ത് ആദ്യമായി ഐഎസ്ഒ അംഗീകാരം നേടിയ അക്ഷയ കേന്ദ്രമെന്ന നേട്ടവും ഷാജഹാന്റെ സ്ഥാപനത്തിനുണ്ട്. രാജ്യത്തെ കോമൺ സർവീസ് സെന്ററുകളുടെ പ്രവർത്തനമികവിലും ശ്രദ്ധേയമായ സ്ഥാനം നേടാൻ അദ്ദേഹത്തിന്റെ സ്ഥാപനത്തിന് കഴിഞ്ഞിട്ടുണ്ട്.
അക്ഷയ സംരംഭകരുടെ കമ്പനിയായ ഇ വോയ്സ് ഇൻഫോ പ്രൈവറ്റ് ലിമിറ്റഡിന്റെയും സർക്കാരിനെയും പൊതുജനങ്ങളെയും അക്ഷയയെയും കൂട്ടിയോജിപ്പിക്കുന്ന മാധ്യമമായി പ്രവർത്തിക്കുന്ന അക്ഷയ ന്യൂസ് കേരളയുടെയും ഡയറക്ടർ കൂടിയാണ് ഷാജഹാൻ.
അംഗീകാരങ്ങൾ പ്രചോദനമാക്കി, ജനസേവനം ലക്ഷ്യമാക്കി അക്ഷയയുടെ പുതിയ കാലഘട്ടത്തിലേക്കു മുന്നേറുകയാണ് അദ്ദേഹം.