ലണ്ടന്: ഇംഗ്ലീഷ് പ്രീമിയര് ലീഗ് ഫുട്ബോളില് അലക്സാണ്ടര് ഐസക്കിന്റെ കന്നിഗോള് പിറന്ന മത്സരത്തില് ലിവര്പൂള് എഫ്സിക്കു ജയം. എവേ പോരാട്ടത്തില് ലിവര്പൂള് 2-0ന് വെസ്റ്റ് ഹാം യുണൈറ്റഡിനെ കീഴടക്കി. ഗോള്രഹിതമായ ആദ്യപകുതിക്കുശേഷം 60-ാം മിനിറ്റിലായിരുന്നു ഐസക്കിന്റെ ഗോള്. പ്രീമിയര് ലീഗില് താരത്തിന്റെ ആദ്യ ഗോളാണ്.
സ്റ്റോപ്പേജ് ടൈമില് കോഡി ഗാക്പോ (90+2) ടീമിന്റെ രണ്ടാം ഗോള് നേടി. 84 മിനിറ്റ് മുതല് ആതിഥേയര് 10 പേരായി ചുരുങ്ങിയിരുന്നു. ഈ സീസണിനു മുമ്പ് ന്യൂകാസില് യുണൈറ്റഡില്നിന്ന് 165.6 മില്യണ് ഡോളര് (ഏകദേശം 1484 കോടി രൂപ) ട്രാന്സ്ഫറിലായിരുന്നു സ്വീഡിഷ് താരമായ ഐസക്ക് ലിവര്പൂളില് എത്തിയത്.
ചെല്സി പവര്
യൂറോപ്പിലെ പവര് ഹൗസുകളില് ഒന്നാണ് തങ്ങളെന്നു തെളിയിക്കുന്ന പ്രകടനവുമായി ചെല്സി എഫ്സി. പ്രീമിയര് ലീഗ് ടേബിള് ടോപ്പേഴ്സായ ആഴ്സണല് എഫ്സിയെ ഹോം മത്സരത്തില് ചെല്സി 1-1 സമനിലയില് തളച്ചു; അതും 38-ാം മിനിറ്റ് മുതല് 10 പേരിലേക്കു ചുരുങ്ങിയശേഷം. 48-ാം മിനിറ്റില് ട്രെവോ ചലോബയിലൂടെ ചെല്സിയാണ് ആദ്യം മുന്നിലെത്തിയത്. മൈക്കല് മെറിനോ (59) ആഴ്സണലിനെ ഒപ്പമെത്തിച്ചു.
ലീഗില് 13 മത്സരങ്ങള് പൂര്ത്തിയായപ്പോള് 30 പോയിന്റുമായി ആഴ്സണല് ഒന്നാം സ്ഥാനത്തു തുടരുന്നു. മാഞ്ചസ്റ്റര് സിറ്റി (25), ചെല്സി (24), ആസ്റ്റണ് വില്ല (24) ടീമുകളാണ് തുടര്ന്നുള്ള സ്ഥാനങ്ങളില്. 21 പോയിന്റുമായി നിലവിലെ ചാമ്പ്യന്മാരായ ലിവര്പൂള് എട്ടാമതാണ്.
Deepika
E-paper LOGIN
LOGIN
