പൂവാർ : സ്ഥാനാർഥിക്ക് വോട്ട് അഭ്യർഥിക്കുന്നതിനിടെ അനൗൺസർ കുഴഞ്ഞ് വീണ് മരിച്ചു. പൂവാർ ആഷിയാനയിൽ പി.താജുദ്ദീൻ (54) ആണ് മരിച്ചത്. തമിഴ്നാട് അഴകിയ മണ്ഡപം നാഗർ സ്ട്രീറ്റ് കൈതേ മില്ലത്ത് താമസിക്കുന്ന താജുദ്ദീൻ തെരഞ്ഞെടുപ്പ് പ്രമാണിപ്പുള്ള പ്രചാരണത്തിനാണ് നാട്ടിൽ എത്തിയത്.
ഇന്നലെ പൂവാർ പഞ്ചായത്തിൽ ടൗൺ വാർഡിലെ എൽഡിഎഫ് സ്ഥാനാർഥി എസ്.അഹമ്മദ് കബീറിന് വേണ്ടി ഓട്ടോയിൽ അനൗൺസ്മെന്റ് ചെയ്യുന്നതിന്ന് ഇടയിൽ ഓട്ടോയിൽ തന്നെ കുഴഞ്ഞ് വീഴുകയായിരുന്നു. താജുദ്ദീന്റെ അമ്മ പൂവാർ ആശുപത്രിയിൽ ചികിത്സയിലാണ്. രാവിലെ അമ്മയെ ആശുപത്രിയിൽ പോയി കണ്ട ശേഷമാണ് ഉച്ചയോടെ പ്രചാരണത്തിനായി പോയത്.
വാഹനത്തിൽ കയറി കുറച്ച് ദൂരം അനൗൺസ് ചെയ്യുന്നതിനിടയിൽ കുഴഞ്ഞ് വീഴുകയായിരുന്നു. ഉടൻ തന്നെ തൊട്ടടുത്തുള്ള പൂവാർ സർക്കാർ ആശുപത്രിയിൽ എത്തിക്കുന്നതിനിടയിൽ മരണം സംഭവിച്ചതായി പൂവാർ പോലീസ് അറിയിച്ചു. മൃതദേഹം പോസ്റ്റ് മോർട്ടത്തിനായി മെഡിക്കൽ കോളജിലേക്ക് മാറ്റി. ഭാര്യ : സുൽത്താന. മകൻ : നസീം.