തിരുവനന്തപുരം: കേരള പൊലിസിലെ സായുധ ബറ്റാലിയനുകളിൽ വനിതാ പൊലിസുകാരെക്കൂടി ഉൾപ്പെടുത്തണമെന്ന് സർക്കാരിനു ശിപാർശ സമർപ്പിച്ചു. നിലവിൽ പുരുഷന്മാർക്കു മാത്രമായി നിശ്ചയിച്ചിട്ടുള്ള സായുധ ബറ്റാലിയനുകളുടെ ഘടന മാറ്റാനാണ് ഈ നിർദേശം. സംസ്ഥാനത്ത് നിലവിൽ തിരുവനന്തപുരം മേനംകുളം ആസ്ഥാനമായി ഒരു കേരള സായുധ വനിതാ പൊലിസ് ബറ്റാലിയൻ മാത്രമാണുള്ളത്.
പുതിയ നിർദേശം അംഗീകരിക്കപ്പെട്ടാൽ, കേരള ആംഡ് പൊലിസ് 1-6, സ്പെഷൽ ആംഡ് പൊലിസ്, മലബാർ സ്പെഷൽ പൊലിസ്, റാപ്പിഡ് റെസ്പോൺസ് ആൻഡ് റെസ്ക്യൂ ഫോഴ്സ്, ഇന്ത്യ റിസർവ് ബറ്റാലിയൻ, സ്റ്റേറ്റ് ഇൻഡസ്ട്രിയൽ സെക്യൂരിറ്റി ഫോഴ്സ് എന്നീ ബറ്റാലിയനുകളിൽ വനിതകൾക്കു നിയമനം ലഭിക്കും. ഇതു വനിതാ പൊലിസിനു സ്വന്തം വീടുകൾക്കടുത്തുള്ള ബറ്റാലിയനുകളിൽ പോസ്റ്റിംഗ് ലഭിക്കാൻ സഹായകരമാകും. വർഷങ്ങളായി ക്യാമ്പിൽ കുടുങ്ങിക്കിടക്കുമ്പോൾ കുടുംബങ്ങളിൽനിന്നും വീടുകളിൽനിന്നും അകന്നുനിൽക്കുന്നതു മാനസിക സമർദം വർധിക്കാനും ഇടയാക്കും.
ഇതോടൊപ്പംതന്നെ കേരള പൊലിസിലെ വനിതാ പ്രാതിനിധ്യം 33 ശതമാനമായി ഉയർത്താനും സിവിൽ പൊലിസ് ഓഫിസർ നിയമന അനുപാതത്തിൽ മാറ്റം വരുത്താനും സംസ്ഥാന പൊലിസ് മേധാവി ശിപാർശ നൽകിയിട്ടുണ്ട്. ഇനി പത്തു പേരെ നിയമിക്കുമ്പോള് മൂന്നും വനിതകൾക്കും അവസരം ലഭിക്കുന്ന രീതിയിലാണ് ശിപാർശ. ശിപാര്ശകള് ആഭ്യന്തര വകുപ്പ് പരിശോധിച്ചതായും നിലവില് അവ മുഖ്യമന്ത്രിയുടെ ഓഫിസിന്റെ പരിഗണനയിലാണെന്നും പൊലിസ് വൃത്തങ്ങള് സൂചിപ്പിച്ചു.
നിലവില് പൊലിസ് സേനയില് 9-10 ശതമാനം മാത്രമാണ് സ്ത്രീകളെന്നാണ് കണക്ക്. ഇത് 33 ശതമാനമായി ഉയര്ത്താനാണ് ലക്ഷ്യമിടുന്നത്. പുതിയ നിര്ദേശത്തിന് അംഗീകാരം ലഭിച്ചാല്, അത് പൊലിസിന്റെ പ്രവര്ത്തനരീതിയില് വലിയ മാറ്റങ്ങള് കൊണ്ടുവരും. കുറ്റകൃത്യങ്ങള്ക്കിരയായ സ്ത്രീകള്, പോക്സോ കേസുകളിലെ അതിജീവിതകള് എന്നിവരില്നിന്നു മൊഴിയെടുക്കുന്നതും വീടുകളിലെ പരിശോധനകള് നടത്തുന്നതുമുള്പ്പടെ നിരവധി ചുമതലകള് വനിതാ പൊലിസ് ഉദ്യോഗസ്ഥര് നിര്വഹിക്കുന്നുണ്ട്.