27

കാഠ്മണ്ഡു: പശ്ചിമ നേപ്പാളിലെ മനാങ് ജില്ലയിലുള്ള ഹിംലംഗ് ഹിമാൽ പർവതനിരയിലുണ്ടായ ഹിമപാതത്തിൽ പർവതാരോഹകർ അടക്കം 10 പേരെ കാണാതായി. 7,126 മീറ്റർ ഉയരമുള്ള പർവതത്തിന്‍റെ ബേസ് ക്യാമ്പിലാണ് ഞായറാഴ്ച ഈ ദുരന്തം ഉണ്ടായത്.

കനത്ത മഴയും മഞ്ഞുവീഴ്ചയും നാലുദിവസമായി നേപ്പാളിൽ തുടരുകയാണ്. ഇത് രാജ്യത്തുടനീളം പ്രളയത്തിനും ഉരുൾപൊട്ടലിനും കാരണമായിട്ടുണ്ട്. ദുരന്ത നിവാരണ സേനയുടെ നേതൃത്വത്തിൽ കാണാതായവർക്കായുള്ള തെരച്ചിൽ ഊർജിതമായി നടക്കുന്നുണ്ട്.

വിവിധ ഏജൻസികളിൽനിന്നുള്ള പർവതാരോഹകരാണ് അപകടത്തിൽപ്പെട്ടത്. കാലാവസ്ഥാ മുന്നറിയിപ്പിനെ തുടർന്ന് ഭൂരിഭാഗം പർവതാരോഹകരും പിന്മാറിയെങ്കിലും ചിലർ ബേസ് ക്യാമ്പിൽ തന്നെ തുടരുകയായിരുന്നു.

തുടർച്ചയായ പ്രതികൂല കാലാവസ്ഥയെത്തുടർന്ന് നേപ്പാളിൽ വിനോദസഞ്ചാര, പർവതാരോഹണ പ്രവർത്തനങ്ങൾ അടിയന്തരമായി നിർത്തിവയ്ക്കാൻ ടൂറിസം വകുപ്പ് നിർദേശം നൽകിയിട്ടുണ്ട്. അധികൃതർ സ്ഥിതിഗതികൾ സൂക്ഷ്മമായി നിരീക്ഷിച്ചുവരികയാണെന്ന് ടൂറിസം വകുപ്പ് ഡയറക്ടർ ജനറൽ റാം കൃഷ്ണ ലാമിച്ചാനെ അറിയിച്ചു.