19

ബിഹാറിലെ ദാർഭംഗയിൽ നിന്ന് പുറത്തുവന്ന ഒരു വീഡിയോ ദൃശ്യം സോഷ്യൽ മീഡിയയിൽ വലിയ ചർച്ചയാകുകയാണ്. ചലിച്ചുകൊണ്ടിരുന്ന ചരക്ക് തീവണ്ടിയുടെ മുകളിൽ കയറിനിന്ന യുവാവ്, ട്രെയിനിന് മുകളിലൂടെയുള്ള ഹൈ-വോൾട്ടേജ് വൈദ്യുത ലൈനിൽ തട്ടി തൽക്ഷണം മരണപ്പെട്ടതാണ് ഈ ദാരുണമായ സംഭവം.

അപകടകരമാണെന്ന് തിരിച്ചറിയാതെ, തീവണ്ടിയുടെ മുകളിലൂടെ നടന്നുനീങ്ങുന്ന യുവാവിനെ വീഡിയോയിൽ കാണാം. സമീപത്തുണ്ടായിരുന്നവർ താഴെയിറങ്ങാൻ ഉറക്കെ വിളിച്ചുപറയുന്നുണ്ടായിരുന്നുവെങ്കിലും അതൊന്നും വകവെക്കാതെ ഇയാൾ മുന്നോട്ടുപോവുകയായിരുന്നു.

ഏറ്റവും ഒടുവിൽ, ട്രെയിനിന് മുകളിലുള്ള വൈദ്യുത കമ്പിയിലേക്ക് കൈ ഉയർത്തിയ നിമിഷം തന്നെ വലിയ സ്ഫോടനത്തോടെ വൈദ്യുതി പ്രവഹിക്കുകയും യുവാവ് തീവണ്ടിയുടെ മുകളിലേക്ക് തന്നെ മറിഞ്ഞുവീഴുകയുമായിരുന്നു.

സംഭവസ്ഥലത്തുവെച്ചുതന്നെ മരണം സംഭവിച്ചതായാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്. മരിച്ച യുവാവ് ആരാണെന്ന കാര്യത്തിൽ ഇതുവരെ സ്ഥിരീകരണമുണ്ടായിട്ടില്ല.

ഇയാൾക്ക് മാനസികാസ്വാസ്ഥ്യം ഉണ്ടായിരുന്നോ എന്നതടക്കമുള്ള കാര്യങ്ങൾ സോഷ്യൽ മീഡിയയിൽ പലരും ചർച്ച ചെയ്യുന്നുണ്ടെങ്കിലും അധികൃതർ ഇക്കാര്യത്തിൽ ഔദ്യോഗികമായി ഒന്നും വ്യക്തമാക്കിയിട്ടില്ല.

തീർത്തും അപകടകരമായ ഇത്തരം പ്രവൃത്തികൾക്ക് മുതിരുന്നത് സ്വന്തം ജീവൻ തന്നെ നഷ്ടപ്പെടുത്താൻ കാരണമാകുമെന്ന വലിയ മുന്നറിയിപ്പാണ് ഈ ദൃശ്യങ്ങൾ പൊതുസമൂഹത്തിന് നൽകുന്നത്.