റബത്ത് (മൊറോക്കോ): 2025 ആഫ്രിക്ക കപ്പ് ഓഫ് നേഷന്സ് ഫുട്ബോള് ചാമ്പ്യനെച്ചൊല്ലി അടിപിടി. ഈ വര്ഷം ജനുവരി 18നു നടന്ന ഫൈനലില് ആതിഥേയരായ മൊറോക്കോയെ അധിക സമയത്തെ ഗോളില് 1-0നു കീഴടക്കി സാദിയൊ മാനെയുടെ സെനഗല് ചാമ്പ്യന്മാരായിരുന്നു.
എന്നാല്, ഫൈനലില് സെനഗല് ടീമിന്റെ അസ്വാഭാവിക പ്രവര്ത്തനങ്ങളുടെ പേരില് ആഫ്രിക്കന് ഫുട്ബോള് കോണ്ഫെഡറേഷന്റെ അപ്പീല് ബോര്ഡ് മൊറോക്കോയെ ജേതാക്കളായി ഇന്നലെ പ്രഖ്യാപിച്ചു. മൊറോക്കോ ഫൈനലില് 3-0ന് സെനഗലിനെ കീഴടക്കി എന്നാണ് ദ കോണ്ഫെഡറേഷന് ഓഫ് ആഫ്രിക്കന് ഫുട്ബോള് (കാഫ്) പ്രസ്താവിച്ചത്.
എന്നാല്, കോണ്ഫെഡറേഷന്റെ നടപടിക്കെതിരേ സാനിയോ മാനെ അടക്കമുള്ളവര് രംഗത്തെത്തി. രാജ്യാന്തര തര്ക്കപരിഹാര കോടതിയിയെ സമീപിക്കുമെന്ന് സെനഗല് ഫുട്ബോള് ഫെഡറേഷന് അറിയിച്ചു. സെനഗല് സര്ക്കാര് ഈ നീക്കത്തിനു പിന്തുണയേകി.
ഫൈനലിന്റെ സ്റ്റോപ്പേജ് ടൈമില് മൊറോക്കോയ്ക്ക് അനുകൂലമായി റഫറി പെനാല്റ്റി വിധിച്ചു. പെനാല്റ്റി വിധിക്കുന്നതിനു മിനിറ്റുകള്ക്കു മുമ്പ് സെനഗലിന്റെ ഗോള് റഫറി നിഷേധിച്ചിരുന്നു. ഇതിന്റെയെല്ലാം പശ്ചാത്തലത്തില് സെനഗല് ടീം പ്രതിഷേധിച്ച് മൈതാനംവിട്ടു. കാണികള് കയ്യാങ്കളി നടത്തി.
വിവിധ ചര്ച്ചകള്ക്കൊടുവില് 15 മിനിറ്റ് വൈകി സെനഗല് ടീം കളത്തിലെത്തി. മൊറോക്കന് ഫോര്വേഡായ ബ്രാഹിം ഡിയസ് എടുത്ത പനേങ്ക സ്റ്റൈല് പെനാല്റ്റി കിക്ക് സെനഗല് ഗോള് കീപ്പര് എഡ്വാര്ഡ് മെന്ഡി രക്ഷപ്പെടുത്തി. അതോടെ മത്സരം അധിക സമയത്തേക്ക്. അധിക സമയത്തെ ഗോളില് സെനഗല് ചാമ്പ്യന്മാരായി.
അപക്വമായ പെരുമാറ്റത്തിന് ഇരുടീമിലെയും താരങ്ങള്ക്ക് കാഫ് വിലക്കും പിഴയും ചുമത്തിയിരുന്നു.
Deepika
E-paper LOGIN
LOGIN
