സമ്പത്തും പദവിയും ആഡംബരവും ജീവിതവിജയത്തിന്റെ അടയാളങ്ങളായി കാണുന്ന ഇന്നത്തെ കാലത്ത്, തന്റെ സർക്കാർ ജോലി ഉപേക്ഷിച്ച് വനവാസവും ആത്മീയതയും തിരഞ്ഞെടുത്ത മുൻ സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ (സിബിഐ) ഇൻസ്പെക്ടറുടെ അനുഭവക്കുറിപ്പ് സമൂഹമാധ്യമങ്ങളിൽ ശ്രദ്ധ നേടുന്നു. പേര് പുറത്തുവിടാത്ത ഈ മുൻ ഉദ്യോഗസ്ഥൻ പങ്കുവെച്ച വീഡിയോയിലൂടെ, ഭൗതിക നേട്ടങ്ങൾക്കപ്പുറമുള്ള മനഃസമാധാനത്തെയും ജീവിതലക്ഷ്യത്തെയും കുറിച്ചുള്ള കാഴ്ചപ്പാടുകളാണ് മുന്നോട്ടുവെക്കുന്നത്.
അന്വേഷണ ഏജൻസിയിൽ ജോലി കിട്ടിയ ആദ്യകാലത്ത് എല്ലാം തികഞ്ഞെന്ന തോന്നലുണ്ടായിരുന്നെങ്കിലും, കാലക്രമേണ ഔദ്യോഗിക സംവിധാനത്തിനുള്ളിൽ തനിക്ക് മാനസികമായി ശ്വാസംമുട്ടൽ അനുഭവപ്പെട്ടതായി അദ്ദേഹം വ്യക്തമാക്കുന്നു. ഔദ്യോഗിക കൃത്യനിർവഹണത്തിന്റെ ഭാഗമായി മറ്റുള്ളവരോട് കർക്കശമായും പരുഷമായും പെരുമാറേണ്ടി വന്നത് സ്വന്തം പ്രകൃതത്തിന് ചേരാത്തതായിരുന്നുവെന്നും, സാമ്പത്തിക ഭദ്രതയുണ്ടായിരുന്നിട്ടും ഉള്ളിലെ ശൂന്യതയും സ്വാതന്ത്ര്യക്കുറവും അലട്ടിയതോടെയാണ് പദവി ഒഴിയാൻ തീരുമാനിച്ചതെന്നും അദ്ദേഹം പറയുന്നു.
ജോലി വിട്ടതിനുശേഷം വിവിധ പ്രദേശങ്ങളിലൂടെ സഞ്ചരിച്ച അദ്ദേഹം ഓംകാരേശ്വറിന് സമീപം നർമ്മദാ നദീതീരത്ത് പരിക്രമത്തിനെത്തിയതോടെയാണ് ജീവിതത്തിൽ വലിയ മാറ്റമുണ്ടായത്. നദീതീരത്ത് എത്തിയതോടെ മനസിന്റെ ഭാരമൊഴിഞ്ഞതായും അതൊരു പുതിയ ആത്മീയ തുടക്കമായെന്നും അദ്ദേഹം ഓർമ്മിക്കുന്നു. അടിസ്ഥാന സൗകര്യങ്ങളോ സമ്പാദ്യമോ ഇല്ലാതെ, ലഭിക്കുന്നത് കഴിച്ച് പ്രാർഥനയിലും ധ്യാനത്തിലും മുഴുകിയ നാളുകളിലൂടെയാണ് അദ്ദേഹം കടന്നുപോയത്. തുടർന്ന് മലമുകളിലെ ഒരു ക്ഷേത്രത്തിൽ സന്യാസിമാർക്കൊപ്പം കുറച്ചുകാലം താമസിക്കുകയും സമീപത്തെ ഗ്രാമത്തിലെ കുട്ടികൾക്ക് പ്രകൃതിയെ അടുത്തറിയാനുള്ള പാഠങ്ങൾ പകർന്നുനൽകുകയും ചെയ്തു. നിലവിൽ വനത്തിലെ ഗുഹകളിൽ കഴിഞ്ഞ് ലളിതമായി പാചകം ചെയ്തും ധ്യാനിച്ചുമാണ് അദ്ദേഹം മുന്നോട്ടുപോകുന്നത്.
സമൂഹത്തിൽ വളർന്നുവരുന്ന അഴിമതിയുടെ വേരുകൾ കുടുംബങ്ങളിൽ നിന്നാണ് തുടങ്ങുന്നതെന്നും വീഡിയോയിൽ അദ്ദേഹം ചൂണ്ടിക്കാണിക്കുന്നു. മറ്റുള്ളവരുടെ സമ്പത്തുമായി മക്കളെ താരതമ്യം ചെയ്യുന്ന രീതി മാതാപിതാക്കൾ അവസാനിപ്പിക്കണമെന്നും, അത്തരം താരതമ്യങ്ങൾ കുട്ടികളെ തെറ്റായ പ്രവണതകളിലേക്ക് നയിക്കുമെന്നുമാണ് അദ്ദേഹത്തിന്റെ അഭിപ്രായം. ഉന്നത പദവികളിലേക്കോ സന്യാസത്തിലേക്കോ നയിക്കുന്നതിനേക്കാൾ പ്രധാനം മക്കളെ സഹാനുഭൂതിയുള്ള നല്ല മനുഷ്യരായി വളർത്തുക എന്നതാണ്. വസ്ത്രധാരണത്തിലല്ല, മറിച്ച് താൻ ചെയ്യുന്ന ജോലിയോടുള്ള ആത്മാർഥതയിലാണ് യഥാർഥ വിശുദ്ധി കുടികൊള്ളുന്നതെന്നും, സ്വയം തിരിച്ചറിയുന്നതിലാണ് യഥാർഥ സ്വാതന്ത്ര്യവും സന്തോഷവുമെന്നും ഈ മുൻ ഉദ്യോഗസ്ഥൻ അടിവരയിടുന്നു.