കോട്ടയം: ആധുനിക കാലഘട്ടത്തില്‍ ട്രേഡ് യൂണിയന്‍ പ്രവര്‍ത്തനം എങ്ങനെ വേണമെന്നും മാറ്റങ്ങള്‍ വരുത്തേണ്ടത് എന്തിലൊക്കെയാണെന്നും വിശദമായി ചര്‍ച്ച ചെയ്ത് സിഐടിയു സംസ്ഥാന സമ്മേളനം.
ഐടി അടക്കം ന്യൂ ജെന്‍ തൊഴില്‍ മേഖലകളില്‍ ട്രേഡ് യൂണിയന്‍ പ്രവര്‍ത്തനത്തിന് കര്‍മപദ്ധതി തയാറാക്കുന്നതിനുള്ള വിശദമായ ചര്‍ച്ചയും സമ്മേളനത്തില്‍ നടന്നതായി സംസ്ഥാന ജനറല്‍ സെക്രട്ടറി എളമരം കരീം പറഞ്ഞു. കേരളത്തില്‍ പരമ്പരാഗത വ്യവസായ മേഖലകളില്‍ തൊഴിലാളികളുടെ എണ്ണം കുറഞ്ഞുവരുന്നു. പുതിയ തൊഴിലിടങ്ങളും തൊഴില്‍ മേഖലകളും സൃഷ്‌ടിക്കപ്പെടുകയും ചെയ്തു. പുതിയ തൊഴിലിടങ്ങളില്‍ സ്വാധീനം ഉറപ്പിക്കുന്ന രീതിയിലുള്ള പ്രവര്‍ത്തനങ്ങള്‍ക്ക് സമ്മേളനം രൂപംനല്‍കുമെന്നും അഖിലേന്ത്യാ ജനറല്‍ കൗണ്‍സില്‍ അംഗീകരിച്ച നയപരിപാടികള്‍ കേരളത്തില്‍ നടപ്പാക്കുമെന്നും എളമരം കരീം പറഞ്ഞു.
ഐടി, ഐടി എനേബിള്‍ഡ് സര്‍വീസസ്, ടൂറിസം, ഷോപ്‌സ് ആന്‍ഡ് കൊമേഴ്‌സ്യല്‍ എസ്റ്റാബ്ലിഷ്‌മെന്‍റ്സ്, നിര്‍മാണ മേഖലയിലെ പുതിയ സംരംഭങ്ങള്‍, ചെറുകിട വ്യവസായങ്ങള്‍ എന്നിവിടങ്ങളില്‍ സ്വാധീനം ശക്തമാക്കാൻ കര്‍മപദ്ധതി തയാറാക്കും. മത്സ്യബന്ധനം, കള്ളുചെത്ത്, കയര്‍ മേഖല, കശുവണ്ടി വ്യവസായം, ബീഡി എന്നിവയെല്ലാം ദുര്‍ബലമായിക്കൊണ്ടിരിക്കുകയാണ്. എങ്കിലും ആയിരക്കണക്കിന് തൊഴിലാളികള്‍ ഇന്നും അതില്‍ അവശേഷിക്കുന്നുണ്ട്. അവരുടെ വരുമാനം വളരെ കുറവാണ്. പക്ഷേ അവര്‍ ജോലി ചെയ്യുന്നു. നല്ല രീതിയിൽ യുവ തൊഴിലാളികള്‍ രംഗത്തു വന്നിട്ടുണ്ട്. ഇവർക്കായി സിഐടിയു യൂത്ത് വിംഗ് രൂപീകരിച്ചിട്ടുണ്ട്.
ഐടി ഒരു പ്രത്യേക മേഖലയാണ്. സാധാരണപോലെയുള്ള ട്രേഡ് യൂണിയന്‍ പ്രവര്‍ത്തനം അസാധ്യമാണ്. സോഫ്റ്റ്‌വേര്‍ വഴിയാണ് ഇവർ മാനേജ്‌മെന്‍റുമായി ബന്ധപ്പെടുന്നത്. ഏതുസമയത്തും മാനേജ്‌മെന്‍റിന് അവരെ ജോലിയില്‍നിന്ന് ഒഴിവാക്കാനാകും. അതുകൊണ്ട് അവരുടെ സംഘടന എന്ന് പറയുന്നത് അത്ര എളുപ്പമല്ല. എന്നാലും ചില ആളുകള്‍ ധൈര്യസമേതം ട്രേഡ് യൂണിയന്‍ രംഗത്തേക്ക് കടന്നുവരുന്നുണ്ട്. ഇവരെ സംഘടിപ്പിക്കുമെന്നും എളമരം കരീം പറഞ്ഞു.
പുതിയ സാങ്കേതിക വിദ്യ അടിസ്ഥാനപ്പെടുത്തി തൊഴിലാളികളെ കോര്‍ത്തിണക്കിയുള്ള ഒരു പുതിയ നയ പരിപാടിയും സമ്മേളനം മുന്നോട്ടു വച്ചിട്ടുണ്ട്.
സംസ്ഥാന സമ്മേളനത്തിന് ഇന്നു സമാപനം
കോട്ടയം: ഒരു ലക്ഷം തൊഴിലാളികളും ബഹുജനങ്ങളും പങ്കെടുക്കുന്ന മഹാ പൊതുസമ്മേളത്തോടെ സിഐടിയു 16-ാം സംസ്ഥാന സമ്മേളനത്തിന് ഇന്നു സമാപനം. മാമ്മന്‍ മാപ്പിള ഹാളില്‍ നടക്കുന്ന പ്രതിനിധി സമ്മേളനം ഇന്ന് ഉച്ചയോടെ പുതിയ ഭാരവാഹികളെ തെരഞ്ഞെടുക്കും. തുടര്‍ന്നു സമ്മേളന പ്രതിനിധികള്‍ വൈകുന്നേരം നാലോടെ റാലിയായി പൊതുസമ്മേളന വേദിയായ നെഹ്‌റു സ്റ്റേഡിയത്തിലേക്ക് എത്തും. മോട്ടോര്‍ സൈക്കിളുകളില്‍ വോളണ്ടിയര്‍മാര്‍ റാലിക്ക് അകമ്പടിയേകും. വാദ്യമേളങ്ങളുടെയും കലാരൂപങ്ങളുടെയും അകമ്പടിയോടെ റാലി കെകെ റോഡുവഴി സെന്‍ട്രല്‍ ജംഗ്ഷനിലെത്തി വൈഎംസിഎ ജംഗ്ഷന്‍ വഴി ശാസ്ത്രി റോഡിലൂടെ കുര്യന്‍ ഉതുപ്പ് റോഡു വഴി നെഹ്‌റു സ്‌റ്റേഡിയത്തിലെത്തും.
തുടര്‍ന്നു നടക്കുന്ന പൊതുസമ്മേളനം പ്രതിപക്ഷ നേതാവ് പിണറായി വിജയന്‍ ഉദ്ഘാടനം ചെയ്യും. സിഐടിയു ദേശീയ പ്രസിഡന്‍റ് സുദീപ് ദത്ത്, വൈസ് പ്രസിഡന്‍റ് തപന്‍ സെന്‍, ദേശീയ സെക്രട്ടറി എ.ആര്‍. സിന്ധു, എളമരം കരീം, ടി.പി. രാമകൃഷ്ണന്‍, കെ.കെ. ജയചന്ദ്രന്‍, വി. ശിവന്‍കുട്ടി, വി.എന്‍. വാസവന്‍, റെജി സഖറിയ, കെ. അനില്‍കുമാര്‍, ടി.ആര്‍. രഘുനാഥന്‍ എന്നിവര്‍ പ്രസംഗിക്കും.
ഡിസംബറില്‍ പാര്‍ലമെന്‍റും ഫെബ്രുവരിയില്‍ സെക്രട്ടേറിയറ്റും വളയും
കോട്ടയം: കേന്ദ്ര, സംസ്ഥാന സര്‍ക്കാരുകള്‍ക്കെതിരേ ശക്തമായ സമരത്തിന് സിഐടിയു. യുഡിഎഫ് സര്‍ക്കാരിന്‍റെ ജനദ്രോഹ നയങ്ങള്‍ക്കെതിരെ അടുത്ത വര്‍ഷം ഫെബ്രുവരിയില്‍ ഒരു ലക്ഷം തൊഴിലാളികളെ അണിനിരത്തി സെക്രട്ടേറിയേറ്റ് വളയും.
ലേബര്‍ കോഡുകള്‍ പിന്‍വലിക്കണമെന്നും തെരഞ്ഞെടുപ്പ് കമ്മിഷണര്‍ ഗ്യാനേഷ് കുമാറിനെ പുറത്താക്കണമെന്ന് ആവശ്യപ്പെട്ട് ഡിസംബര്‍ ഒന്ന്, രണ്ട് തീയതികളില്‍ സിഐടിയു നേതൃത്വത്തില്‍ ലക്ഷം തൊഴിലാളികള്‍ അണിനിരക്കുന്ന പാര്‍ലമെന്‍റ് മാര്‍ച്ചും നടത്തും.
ബദല്‍ നയങ്ങള്‍ ഉയര്‍ത്തുന്നവരെ ഇഡിയെ ഉപയോഗിച്ച് വേട്ടയാടുന്ന കേന്ദ്ര സര്‍ക്കാര്‍ നീക്കത്തിനെതിരേയും സിഐടിയു സമരരംഗത്തെത്തും.
എസ്‌ഐആര്‍, ലേബര്‍കോഡ്, സരള്‍നിയമം, ആഴക്കടല്‍ മണല്‍ ഖനനം, കേരള മാരിടൈം ബോര്‍ഡ് ബില്‍ എന്നിവയ്‌ക്കെതിരെയും ശക്തമായ സമരങ്ങള്‍ ആരംഭിക്കാന്‍ സമ്മേളനം തീരുമാനിച്ചു.
Deepika
Corehub Solutions
E-paper LOGIN
LOGIN
