ആലപ്പുഴ: ജി. സുധാകരന്റെ ഫേസ്ബുക്ക്പേജിൽ സിപിഎം പോസ്റ്റ് ചെയ്ത പെരുന്പളം പാലം ഉദ്ഘാടനത്തിന്റെ ലൈവ് ടെലികാസ്റ്റ് വീഡിയോ കുടുംബം ഇടപെട്ട് നീക്കിച്ചു.
മുഖ്യമന്ത്രിയുടെ ഉദ്ഘാടന വീഡിയോ മാറ്റിച്ചതിലൂടെ പാർട്ടിയുമായി ചേർന്നുപോകാൻ താത്പര്യമില്ലെന്ന നിലപാട് വീണ്ടും പ്രകടമാക്കുകയാണ് ജി.സുധാകരൻ.
സുധാകരന്റെ അനുമതിയില്ലാതെ സിപിഎം ജില്ലാ കമ്മിറ്റിയുടെ സോഷ്യൽ മീഡിയാ വിഭാഗം അദ്ദേഹത്തിന്റെ ഫേസ്ബുക്ക് പേജിൽ മുഖ്യമന്ത്രി പങ്കെടുക്കുന്ന ഉദ്ഘാടനത്തിന്റെ ലൈവ് വീഡിയോ പോസ്റ്റ് ചെയ്തത്.
സംഭവം ശ്രദ്ധയിൽപ്പെട്ടതോടെ സുധാകരന്റെ കുടുംബം ജില്ലാ കമ്മിറ്റി ഓഫീസിൽ ബന്ധപ്പെട്ട് വീഡിയോ നീക്കം ചെയ്യാൻ നിർദേശം നൽകി. ഇതോടെ വീഡിയോ ഒഴിവാക്കി.
ജി.സുധാകരൻ മന്ത്രിയായിരിക്കേ ആരംഭിച്ച പെരുമ്പളം പാലം പദ്ധതിയുടെ ഉദ്ഘാടന ചടങ്ങിൽ അദ്ദേഹം പങ്കെടുക്കാനെത്തുമോ എന്ന ആകാംക്ഷ തുടരവേയാണ് അദ്ദേഹത്തിന്റെ തന്നെ ഫേസ് ബുക്ക് പേജിൽ ലൈവ് വന്നത്.