നെടുമങ്ങാട്: പത്താംകല്ലിൽ കോൺഗ്രസ്- സിപിഎം സംഘർഷം. നാല് കോൺഗ്രസ് പ്രവർത്തകർക്ക് പരിക്കേറ്റു. പ്രവർത്തകരെ മർദിച്ചവരെ അറസ്റ്റ് ചെയ്യണമെന്ന് ആവശ്യപ്പെട്ട് കോൺഗ്രസ് നെടുമങ്ങാട് പോലീസ് സ്റ്റേഷനിലേക്കു മാർച്ചു നടത്തി. പത്താംകല്ലിലെ യുഡിഎഫ് തെരഞ്ഞെടുപ്പ് ബൂത്ത് കമ്മിറ്റി ഓഫീസിലേക്ക് ഒരു സംഘം സിപിഎം പ്രവർത്തകർ അതിക്രമിച്ചു കടന്ന് ആക്രമണം നടത്തിയതായി കോൺഗ്രസ് പ്രവർത്തകർ ആരോപിച്ചു.
പ്രവർത്തകരായ അൽഫിയ, റംജിന, റെഫീക്ക്, സഫീർ എന്നിവർക്കാണു പരിക്കേറ്റത്. ഇവരെ നെടുമങ്ങാട് ജില്ലാ ആശുപത്രിയിൽ പ്രവേശിപ്പിച്ചു. ഇന്നലെ രാത്രി ഏഴരയോടെയായിരുന്നു സംഭവം. ആക്രമണത്തിൽ പ്രതിഷേധിച്ചു രാത്രി വൈകിയും കോൺഗ്രസിന്റെ പോലീസ് സ്റ്റേഷൻ ഉപരോധം തുടർന്നു.