Kerala
തിരുവനന്തപുരം: ബംഗളൂരു സ്വദേശിനിയായ ഇരുപത്തിയൊന്നുകാരിയെ ലൈംഗികമായി പീഡിപ്പിച്ചെന്ന കേസില് രാഹുല് മാങ്കൂട്ടത്തിൽ എംഎല്എയുടെ മുന്കൂര് ജാമ്യം റദ്ദാക്കണമെന്ന് ആവശ്യപ്പെട്ട് പോലീസ് സമര്പ്പിച്ച ഹര്ജി കോടതി തള്ളി.
തിരുവനന്തപുരം ഒന്നാം ക്ലാസ് ജുഡീഷല് മജിസ്ട്രേട്ട് കോടതിയാണ് ഹര്ജി പരിഗണിച്ചത്. പരാതിക്കാരി നെടുമങ്ങാട് കോടതിയില് രഹസ്യമൊഴി നല്കിയതിനു പിന്നാലെ ഫെബ്രുവരി 17ന് രാഹുല് അവരെ വാട്സ്ആപ്പില് ബന്ധപ്പെടാന് ശ്രമിച്ചുവെന്നു ചൂണ്ടിക്കാട്ടിയാണ് പ്രത്യേക അന്വേഷണ സംഘം ജാമ്യം റദ്ദാക്കാന് കോടതിയെ സമീപിച്ചത്.
ജില്ലാ കോടതിയുടെ ജാമ്യവ്യവസ്ഥ രാഹുല് ലംഘിച്ചുവെന്നും പരാതിക്കാരിയെ സ്വാധീനിക്കാന് ശ്രമിച്ചുവെന്നുമായിരുന്നു പ്രോസിക്യൂഷന് വാദം. അതേസമയം പോലീസിന്റെ നീക്കം രാഷ്ട്രീയപ്രേരിതമാണെന്നും പരാതിക്കാരിയെ ബന്ധപ്പെടാന് രാഹുല് ശ്രമിച്ചിട്ടില്ലെന്നും പ്രതിഭാഗം വാദിച്ചു.
Kerala
കൊച്ചി: പശ്ചിമേഷ്യൻ സംഘർഷങ്ങളുടെ പശ്ചാത്തലത്തിൽ കൊച്ചി അന്താരാഷ്ട്ര വിമാനത്താവളത്തില് 58 സര്വീസുകള് റദ്ദാക്കി. കൊച്ചിയില് നിന്നും പുറപ്പെടേണ്ട 31 സര്വീസുകളും എത്തിച്ചേരണ്ട 27 സര്വീസുകളുമാണ് റദ്ദാക്കിയത്.
കുവൈറ്റ്, അബുദാബി, ജിദ്ദ, മസ്കറ്റ്, റാസല്ഖൈമ, ദോഹ, ബഹ്റൈന് തുടങ്ങിയ ഗള്ഫ് രാജ്യങ്ങളിലേക്കുള്ള വിമാനങ്ങളും അവിടെ നിന്നും എത്തേണ്ട വിമാനങ്ങളുമാണ് റദ്ദു ചെയ്തത്.
എന്നാല് കൊച്ചിയില് നിന്നും മൂന്നു വിമാനങ്ങള് ഇന്ന് ഗള്ഫിലേക്ക് സര്വീസ് നടത്തുന്നുണ്ട്. 8.10നും 2.25നും മസ്കറ്റിലേക്ക് ഒമാന് എയര്വേസ് സര്വീസ് നടത്തും. 11.30ന് ജിദ്ദയിലേക്ക് സൗദി എയര്ലൈന്സ് സര്വീസ് നടത്തും. ഇറാന് - ഇസ്രയേല് - അമേരിക്ക സംഘര്ഷത്തെ തുടര്ന്ന് കഴിഞ്ഞ ദിവസം 23 സര്വീസുകളായിരുന്നു റദ്ദാക്കിയിരുന്നത്.
സംഘര്ഷം മൂന്നാം ദിവസവും തുടരുകയാണ്. ഖമനയ്യുടെ കൊലപാതകത്തിന് പ്രതികാരം ചെയ്യുമെന്ന് ഇറാന് വ്യക്തമാക്കിയിരുന്നു. ഇതിന് പിന്നാലെയാണ് ഗള്ഫ് രാജ്യങ്ങളിലേക്ക് ആക്രമണം കടുപ്പിച്ചത്.
ലെബനനില് നിന്ന് ഹിസ്ബുള്ളയെ ഉപയോഗിച്ചും ഇസ്രയേലിനെതിരെ ഇറാന് പൊരുതുന്നുണ്ട്. ദുബായി വിമാനത്താവളം, ബുര്ജ് ഖലീഫ, ബഹ്റൈനിലെയും കുവൈത്തിലെയും ഖത്തറിലെയും അമേരിക്കന് സൈനികത്താവളങ്ങള് എന്നിവിടങ്ങളാണ് ഇറാന് ലക്ഷ്യമിട്ടത്.
Kerala
തിരുവനന്തപുരം: വര്ഷത്തില് അഞ്ചോ അതിലധികമോ നിയമലംഘനം നടത്തിയാല് വാഹനം ഓടിച്ചയാളുടെ ലൈസന്സ് റദ്ദാക്കുമെന്ന് വ്യവസ്ഥ ചെയ്ത് മോട്ടോര് വാഹന ചട്ടം ഭേദഗതി ചെയ്ത കേന്ദ്ര നടപടിയില് പ്രതികരണവുമായി ഗതാഗതമന്ത്രി കെ.ബി. ഗണേഷ് കുമാര്.
സംസ്ഥാന സര്ക്കാര് ഇക്കാര്യത്തില് ഒരു തീരുമാനവും ഇതുവരെ എടുത്തിട്ടില്ലെന്നും മോട്ടോര് വാഹന നിയമത്തിലെ കേന്ദ്ര ഭേദഗതികള് കൂടിയാലോചനയ്ക്ക് ശേഷം മാത്രമേ സംസ്ഥാനത്ത് നടപ്പിലാക്കൂ എന്നും ഗണേഷ് കുമാര് ഫെയ്സ്ബുക്കില് കുറിച്ചു.
സാധാരണക്കാര്ക്ക് ബുദ്ധിമുട്ട് ഉണ്ടാക്കാത്ത രീതിയില് മാത്രമേ നിയമങ്ങള് നടപ്പിലാക്കൂ. മോട്ടോര് വാഹന നിയമങ്ങള് പലതും കര്ശനമാക്കിയാലേ സംസ്ഥാനത്തെ അപകടങ്ങള് കുറയൂ. എങ്കിലും കേന്ദ്ര നിയമങ്ങള് പലതും അതേപടി സംസ്ഥാനത്ത് നടപ്പിലാക്കില്ല. അത്തരം കേന്ദ്ര മോട്ടോര് വാഹന ഭേദഗതികള് എങ്ങനെ ലഘൂകരിക്കാം എന്നതിനെ കുറിച്ച് പഠിച്ച്, ചര്ച്ച ചെയ്തു മാത്രമേ നടപടി എടുക്കൂ എന്നും ഗണേഷ് കുമാര് വ്യക്തമാക്കി.
Kerala
കൊച്ചി: ഇന്നും യാത്രക്കാരെ വലച്ച് ഇന്ഡിഗോ വിമാന സര്വീസുകള്. വിമാനം റദ്ദാക്കിയതിനെ തുടര്ന്ന് പല യാത്രക്കാരും വലയുകയാണ്. കൊച്ചിയില് യാത്രക്കാര് പ്രതിഷേധിച്ചു.
വ്യാഴാഴ്ച രാത്രി കൊച്ചിയില് നിന്നും ഹൈദരാബാദിലേക്ക് പുറപ്പെടേണ്ട വിമാനത്തിലെ യാത്രക്കാര്ക്ക് ഇന്ന് പുലര്ച്ചെയാണ് വിമാനം റദ്ദാക്കി എന്ന വിവരം ലഭിച്ചത്. ഇതോടെയാണ് യാത്രക്കാര് വിമാനത്താവളത്തില് പ്രതിഷേധിച്ചത്. ഇന്ഡിഗോ ജീവനക്കാരെ തടഞ്ഞുവച്ചായിരുന്നു പ്രതിഷേധം.
വിമാന സര്വീസുകള് ഇനിയും വെട്ടിക്കുറയ്ക്കുമെന്നാണ് ഇന്ഡിഗോ അറിയിച്ചിരിക്കുന്നത്. സാധാരണനിലയിലെത്താന് രണ്ടുമാസം സമയമെടുക്കുമെന്ന് അറിയിച്ച കമ്പനി യാത്രക്കാര്ക്ക് ഉണ്ടാകുന്ന ബുദ്ധിമുട്ടില് ഖേദം പ്രകടിപ്പിച്ചു. സ്ഥിതി മെച്ചപ്പെടുത്താന് ശ്രമം തുടരുന്നുവെന്നാണ് കമ്പനി അറിയിക്കുന്നത്.
പൈലറ്റുമാര്ക്ക് വിശ്രമം ഉറപ്പാക്കാന് ഡിജിസിഎ ഏര്പ്പെടുത്തിയ ഫ്ളൈറ്റ് ഡ്യൂട്ടി ടൈം ലിമിറ്റേഷന് (എഫ്ഡിടിഎല്) നടപ്പാക്കുന്നതിലെ വീഴ്ചയാണു വിമാന സര്വീസുകള് താളംതെറ്റാന് കാരണം.