ചെസ് ലോകത്ത് പുതിയ ചരിത്രം കുറിച്ച് പതിനെട്ടാം വയസിൽ ലോകകിരീടം ചൂടിയ ദൊമ്മരാജു ഗുകേഷ് തന്റെ കരിയറിലെ മറ്റൊരു വലിയ നേട്ടം ചതുരംഗക്കളത്തിൽ നേടാനുള്ള തയാറെടുപ്പിലാണ്.
ഗാരി കാസ്പറോവിന്റെ ദശാബ്ദങ്ങൾ പഴക്കമുള്ള റിക്കാർഡ് തകർത്ത് 2024ൽ ഏറ്റവും പ്രായം കുറഞ്ഞ ലോക ചെസ് ചാന്പ്യനായ ഗുകേഷ് കിരീടം നിലനിർത്താനുള്ള പോരാട്ടത്തിലാണ്.
2026 നവംബർ 24 മുതൽ സ്വിറ്റ്സർലണ്ടിലെ ജനീവയിലുള്ള ഫൗണ്ടേഷൻ മാർട്ടിൻ ബോർഡ്മർ ഇൻ കൊളോഗ്നിയിൽ ആരംഭിക്കുന്ന ലോക ചെസ് ചാന്പ്യൻഷിപ്പിൽ ഗുകേഷ് കിരീടം നിലനിർത്തുമോ എന്ന് വീക്ഷിക്കുന്ന ചെസ് പ്രേമികൾ വലിയ ആവേശത്തിലാണ്.
ഉസ്ബക്കിസ്ഥാന്റെ ഗ്രാൻഡ് മാസ്റ്റർ ജവൊഗിർ സിന്ദരൊവിന്റെ വെല്ലുവിളിയെ അതിജീവിക്കാനുള്ള തീവ്ര പരിശീലനത്തിലാണ് ഗുകേഷ്.
ചരിത്രമെഴുതിയ 2024
2024 ഗുകേഷിന്റെ കരിയറിലെ സുവർണ വർഷമായിരുന്നു. കാനഡയിൽ നടന്ന കാൻഡിഡേറ്റ്സ് ടൂർണമെന്റിൽ വന്പന്മാരായ ഹികരൂ നക്കാമുറ, ഫബിയാനോ കരുവാന, ഇയാൻ നെപൊംനിയാസി എന്നിവരെയെല്ലാം മറികടന്ന് ഒന്നാമതെത്തി ചരിത്രം കുറിച്ചു. പതിനേഴാം വയസിൽ ലോക ചെസ് ചാന്പ്യൻഷിപ്പ് ഫൈനലിന് യോഗ്യത നേടുന്ന ഏറ്റവും പ്രായം കുറഞ്ഞ വ്യക്തിയായി.
2024 ഡിസംബർ 12 വ്യാഴാഴ്ച സിംഗപ്പൂരിലുള്ള വേൾഡ് സെന്റൊസ ഐലൻഡിലെ ഇക്വാറിസ് ഹോട്ടലിൽ നടന്ന ഫൈനൽ പോരാട്ടത്തിൽ, ചാന്പ്യനായിരുന്ന ഡിങ് ലിറിനെ അട്ടിമറിച്ച് ലോക ചെസ് ചാന്പ്യൻ നേട്ടം സ്വന്തമാക്കി. ഏറ്റവും പ്രായം കുറഞ്ഞ ലോക ചെസ് ചാന്പ്യൻ എന്ന ചരിത്രം അവിടെ പിറന്നു. 18 വയസും 195 ദിവസവും മാത്രം പ്രായം. കാസ്പറോവിന്റെ 22 വയസിലെ കിരീടനേട്ടമാണ് ഗുകേഷ് പഴങ്കഥയാക്കിയത്. അഞ്ചുതവണ ലോകചാന്പ്യൻ ആയിട്ടുള്ള വിശ്വനാഥൻ ആനന്ദിന്റെ പാത പിന്തുടർന്ന് ലോക ചെസ് കിരീടം നേടുന്ന രണ്ടാമത്തെ ഇന്ത്യക്കാരനുമായി ഗുകേഷ്.
കരിയറിലെ നേട്ടങ്ങൾ
ഏഴാം വയസിൽ ചെസ് പഠിച്ച ഗുകേഷിന്റെ അപാരമായ ഏകാഗ്രതയും തന്ത്രപരമായ നീക്കവും തിരിച്ചറിഞ്ഞത് അദ്ദേഹത്തിന്റെ പരിശീലകരാണ്. 2015ൽ ഒന്പത് വയസിൽ താഴെയുള്ളവരുടെ കാറ്റഗറിയിൽ ഏഷ്യൻ സ്കൂൾ ചെസ് ചാന്പ്യൻ പദവി നേടി.
2018ൽ ലോക യൂത്ത് ചെസ് ചാന്പ്യൻഷിപ്പിൽ അഞ്ച് സ്വർണമെഡലുകൾ നേടി. 2019ൽ 12 വയസും ഏഴ് മാസവും 17 ദിവസവും പ്രായമുള്ളപ്പോൾ ഗ്രാൻഡ് മാസ്റ്റർ പദവി നേടി സർജി കരിയാക്കിന് പിന്നിൽ പ്രായം കുറഞ്ഞ രണ്ടാമത്തെ ഗ്രാൻഡ്മാസ്റ്റർ സ്ഥാനത്തെത്തി. 37 വർഷമായി ആനന്ദ് കൈയടക്കിവച്ചിരുന്ന ഫി ഡേ റേറ്റിംഗിലെ ഇന്ത്യയിലെ ഒന്നാം നന്പർ സ്ഥാനം മറികടന്ന് 2023ൽ ഗുകേഷ് ഒന്നാം സ്ഥാനത്ത് എത്തി.
അതേ വർഷംതന്നെ 2750 റേറ്റിംഗ് പോയിന്റ് മറികടക്കുന്ന പ്രായം കുറഞ്ഞ താരം എന്ന മാഗ്നസ് കാൾസന്റെ റിക്കാർഡും ഭേദിച്ചു. 2024 മദ്രാസിൽ നടന്ന 44-ാമത് ചെസ് ഒളിന്പിയാഡിലും 2024ൽ ഹംഗറിയിലെ ബുഡാപെസ്റ്റിൽ നടന്ന 45-മത് ചെസ് ഒളിന്പ്യാഡിലും വ്യക്തിഗത ഇനത്തിലും ടീം ഇനത്തിലും മെഡല് നേടി.
2026ൽ ഉസ്ബക്കിസ്ഥാനിലെ സമർഖണ്ഡിൽ നടന്ന ചെസ് ഒളിന്പ്യാഡിലും വ്യക്തിഗത ഇനത്തിലും ടീം ഇനത്തിലും മെഡല് നേടി. ലോകചാന്പ്യൻ പദവി നേടിയതിനു പുറമേ 2024ലും 25ലും നടന്ന ടാറ്റാ സ്റ്റീൽ ടൂർണമെന്റിലും മികച്ച പ്രകടനമാണ് ഗുകേഷ് കാഴ്ചവച്ചത്. ക്ലാസിക്കൽ ചെസിൽ മുൻ ലോകചാന്പ്യനും ഇപ്പോഴും റേറ്റിംഗില് ഒന്നാമതുള്ള മാഗ്നസ് കാർസനെ തോൽപ്പിച്ചിരുന്നു എന്നതും ശ്രദ്ധേയം.
പരിശീലന രീതികൾ
ബാല്യകാല പരിശീലകൻ ആയിരുന്ന ഗ്രാൻഡ്മാസ്റ്റർ വിഷ്ണു പ്രസന്നയുടെ നിർദേശത്തിലാണ് ചതുരംഗക്കളത്തിൽ ഗുകേഷിന്റെ നീക്കങ്ങൾ. സ്വതന്ത്രമായി ചിന്തിക്കാനുള്ള ശേഷി, കളിയിലെ മാനസികസമ്മർദങ്ങളെ അതിജീവിക്കാനുള്ള കരുത്ത് എന്നിവയ്ക്ക് വിഷ്ണു പ്രസന്ന പ്രാധാന്യം നൽകി.
ശൈലിയും തന്ത്രവും
ഗുകേഷിന്റെ ചതുരംഗക്കളത്തിലെ ശൈലി വേറിട്ടതും സങ്കീർണമായ ബോർഡ് സാഹചര്യങ്ങളെ പോലും സമചിത്തതയോടെ കൈകാര്യം ചെയ്യാൻ പ്രാപ്തിയുള്ളതുമാണ്. ആക്രമിച്ചു കളിക്കാനും പ്രതിരോധിച്ചു നിൽക്കാനും ഒരേപോലെ കഴിവുള്ള ഡൈനാമിക് ആൻഡ് യൂണിവേഴ്സൽ ശൈലി. എൻഡ് ഗെയിം ഘട്ടത്തിൽ കൃത്യമായ നീക്കങ്ങളിലൂടെ ചെറിയ മുൻതൂക്കങ്ങളെ പോലും വിജയം ആക്കി മാറ്റാനുള്ള കഴിവ്. സമനിലയ്ക്ക് ശ്രമിക്കുന്നതിനേക്കാൾ റിസ്ക് എടുത്ത് വിജയത്തിന് ശ്രമിക്കുന്നതാണ് ഗുകേഷിന്റെ രീതി.
കുടുംബം
2006 മെയ് 29ന് ചെന്നൈയിൽ തെലുങ്ക് കുടുംബത്തിലാണ് ഗുകേഷ് ജനിച്ചത്. അച്ഛൻ ഡോക്ടർ രജനീകാന്ത് ഇഎൻടി സർജൻ ആണ്. അമ്മ ഡോക്ടർ പത്മകുമാരി മൈക്രോബയോളജിസ്റ്റ് ആണ്.
പഠനം
ചെന്നൈയിലെ മേൽ അയനന്പക്കത്തുള്ള വേലമ്മാൽ വിദ്യാലയത്തിലായിരുന്നു ഗുകേഷ് പഠനം ആരംഭിച്ചത്. എലീറ്റ് ചെസ് മത്സരങ്ങളുടെയും കഠിനമായ പരിശീലനങ്ങളുടെയും തിരക്കുകൾ കാരണം ഗുകേഷിന് നാലാം ക്ലാസിനു ശേഷം പതിവായി സ്കൂളിൽ പോകാൻ സാധിക്കാതെവന്നു.