ന്യൂഡൽഹി: വോട്ടർപട്ടികയിലെ ക്രമക്കേടുകൾക്കെതിരേയും മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടും രാജ്യതലസ്ഥാനത്തു നടക്കുന്ന പ്രതിഷേധങ്ങൾ ശക്തമാക്കി കോൺഗ്രസിന്‍റെ വിദ്യാർഥിസംഘടനയായ എൻഎസ്‌യുഐ. ഇതിന്‍റെ ഭാഗമായി ഇന്നലെ എൻഎസ്‌യുഐ പ്രവർത്തകർ ജന്തർ മന്തർ ലക്ഷ്യമാക്കി ശക്തമായ മാർച്ചും പ്രതിഷേധവും സംഘടിപ്പിച്ചു.
ജന്തർ മന്തറിലേക്ക് ഇരച്ചെത്തിയ പ്രവർത്തകരെ അശോക റോഡിൽ പൊലിസ് ബാരിക്കേഡുകൾ വച്ച് തടഞ്ഞു. എന്നാൽ, പിന്തിരിയാൻ തയാറാകാതിരുന്ന പ്രവർത്തകർ ബാരിക്കേഡുകൾക്കു മുകളിൽ കയറി മുദ്രാവാക്യം വിളികളുമായി പ്രതിഷേധം തുടർന്നതോടെ പൊലിസുകാർ ഇവരെ കസ്റ്റഡിയിലെടുത്ത് നീക്കി.
വരാനിരിക്കുന്ന പ്രതിഷേധ പരിപാടികൾ
ദസറ അവധിക്കു നൽകിയ ചെറിയ ഇടവേളയ്ക്കുശേഷം പ്രതിപക്ഷ ഇന്ത്യ സഖ്യത്തിന്‍റെ നേതൃത്വത്തിലുള്ള പ്രതിഷേധങ്ങൾ ഈ മാസം 25ഓടെ വീണ്ടും സജീവമാക്കാൻ തീരുമാനിച്ചിട്ടുണ്ട്. നവംബർ ഒന്നിന് രാംലീല മൈതാനിയിൽ നടത്താൻ നിശ്ചയിച്ചിരിക്കുന്ന മഹാറാലിക്കു മുന്നോടിയായി രാജ്യവ്യാപകമായി പ്രക്ഷോഭങ്ങൾ ശക്തമാക്കാനാണ് പ്രതിപക്ഷ പാർട്ടികളുടെ നീക്കം.
അന്താരാഷ്‌ട്ര തലത്തിലും ശക്തമായ പിന്തുണ
ഇന്ത്യയിലെ വോട്ട് അട്ടിമറിക്കെതിരേയുള്ള സമരങ്ങൾക്ക് അന്താരാഷ്‌ട്രതലത്തിലും പിന്തുണയേറുകയാണ്. ഓസ്ട്രേലിയയിലെ മെൽബൺ, സിഡ്നി, ബ്രിസ്ബേൻ എന്നിവിടങ്ങളിൽ ഇന്ത്യൻ പ്രവാസികൾ പ്രതിഷേധ പ്രകടനങ്ങൾ നടത്തി. ഓസ്ട്രേലിയയിലെ വലതുപക്ഷ സംഘടനയായ നാഷണൽ വർക്കേഴ്സ് അലയൻസ് ഇതു തടയാൻ ശ്രമിച്ചത് ചെറിയ തോതിൽ സംഘർഷത്തിനിടയാക്കി.
ഇംഗ്ലണ്ടിലെ ലീഡ്സിൽ എസ്എഫ്ഐയുടെ നേതൃത്വത്തിൽ ഇന്ത്യൻ വിദ്യാർഥികൾ മാർച്ച് നടത്തി. ശനിയാഴ്ച ലണ്ടൻ പാർലമെന്‍റ് സ്ക്വയറിലെ മഹാത്മാഗാന്ധി സ്മാരകത്തിനു സമീപം നടന്ന പ്രതിഷേധത്തിൽ പ്രമുഖ യുട്യൂബർ ധ്രുവ് റാത്തിയും പങ്കെടുത്തിരുന്നു.
വിദേശ പിന്തുണയിൽ നിലപാടു കടുപ്പിച്ച് കേന്ദ്രം
അതേസമയം, ഇന്ത്യയിലെ പ്രതിഷേധവുമായി ബന്ധപ്പെട്ട് മറ്റു രാജ്യങ്ങള്‍ പ്രതികരിക്കുന്നതിനെ അതിരൂക്ഷമായിട്ടാണ് കേന്ദ്രസര്‍ക്കാര്‍ വിമര്‍ശിച്ചത്. ഇന്ത്യയിലെ പ്രതിഷേധങ്ങളില്‍ മറ്റു രാജ്യങ്ങള്‍ അഭിപ്രായം പറയേണ്ടതില്ലെന്നാണ് കേന്ദ്ര നിലപാട്.
Deepika
Corehub Solutions
E-paper LOGIN
LOGIN
