ന്യൂഡൽഹി: നാലായിരം അഗ്നിവീർ ഭടന്മാരുടെ വിവരങ്ങൾ ഹാക്ക് ചെയ്ത് ഡാർക്ക് വെബ്ബിൽ വിറ്റഴിക്കാൻ ശ്രമിച്ച 14 കാരൻ പിടിയിൽ.
ഹരിയാന ബല്ലാബാർഗിൽ നിന്നാണ് 14കാരനായ ഹാക്കറെ ഡൽഹി പൊലിസിന്റെ സ്പെഷ്യൽ സെൽ പിടികൂടിയത്.
സൈനികരുടെ വിവരങ്ങൾ 500 ഡോളറിനു വിൽക്കാനാണ് കുട്ടി ശ്രമിച്ചതെന്ന് ഡൽഹി പൊലിസ് വ്യക്തമാക്കി.
അഗ്നിവീറിനായി ഉദ്യോഗാർഥികൾ രജിസ്ട്രേഷൻ ചെയ്യുന്ന വെബ്സൈറ്റ് ഹാക്ക് ചെയ്താണ് വിവരങ്ങൾ ചോർത്തിയത്. വിവരശേഖരണത്തിനായി എഐയുടെ സഹായവും കുട്ടി തേടി. സൈനികരുടെ വിവരങ്ങൾ തന്റെ കൈവശമുണ്ടെന്നു കാട്ടി ഡാർക്ക് വെബ്ബിലിട്ട പരസ്യമാണ് കുട്ടി ഹാക്കർ ചെയ്ത ഏക പിഴവ്.
തുടർന്ന് ഡൽഹി പൊലിസിന്റെ പ്രത്യേക വിഭാഗമായ ഇന്റലിജൻസ് ഫ്യൂഷൻ ആൻഡ് സ്ട്രാറ്റജിക് ഓപ്പറേഷൻസ് നടത്തിയ അന്വേഷണം 14കാരനിൽ എത്തുകയായിരുന്നു. കുട്ടിയെ ജുവനൈൽ നിയമങ്ങളുടെ അടിസ്ഥാനത്തിൽ ചോദ്യം ചെയ്തു രക്ഷിതാക്കൾക്കൊപ്പം വിട്ടയച്ചു.