കടുത്തുരുത്തി: നിയോജകമണ്ഡലത്തിന്റെ വികസനത്തിനായി സര്ക്കാര് കര്മപരിപാടികള് ആവിഷ്കരിച്ച് നടപ്പിലാക്കുമെന്ന് മന്ത്രി മോന്സ് ജോസഫ്. കേരള കോണ്ഗ്രസ് കടുത്തുരുത്തി നിയോജകമണ്ഡലം പ്രവര്ത്തക സമ്മേളനം കടുത്തുരുത്തി കടപ്പൂരാന് ഓഡിറ്റോറിയത്തില് ഉദ്ഘാടനം ചെയ്യുകയായിരുന്നു അദേഹം. എല്ഡിഎഫ് സര്ക്കാരിന്റെ കഴിഞ്ഞ പത്തു വര്ഷക്കാലത്തെ ഭരണത്തില് മനപ്പൂര്വമായി തടഞ്ഞു വച്ചിരുന്നതും അനാവശ്യ തടസങ്ങള് ഉന്നയിച്ചു മുടക്കിയിട്ടിരുന്നതുമായ എല്ലാ വികസന പ്രവര്ത്തനങ്ങളും പുനരാരംഭിച്ച് സമയബന്ധിതമായി പൂര്ത്തിയാക്കുവാന് സര്ക്കാര് തലത്തില് ഇടപെടല് നടത്തുമെന്ന് മന്ത്രി പറഞ്ഞു. ജനോപകാരപ്രദമായ പുതിയ പദ്ധതികളും പ്രധാനപ്പെട്ട വിവിധ സ്ഥാപനങ്ങളും നിയോജകമണ്ഡലത്തിലെ പതിനൊന്ന് പഞ്ചായത്തുകളിലും ആരംഭിക്കുന്നതിനുള്ള നടപടികള് സര്ക്കാര് തലത്തില് ആരംഭിച്ചിട്ടുണ്ടെന്നും മന്ത്രി പറഞ്ഞു.
ഓരോ പഞ്ചായത്തിലും നിലനില്ക്കുന്ന അടിസ്ഥാന ആവശ്യം ഏതൊക്കെയാണെന്ന് പരിശോധിക്കാനും മുന്ഗണന നല്കേണ്ട കാര്യങ്ങള് ചര്ച്ച ചെയ്തു തീരുമാനിക്കാനുമായി എല്ലാ പഞ്ചായത്തുകളിലും വികസന ചര്ച്ചകള് സംഘടിപ്പിക്കുമെന്നും മന്ത്രി പറഞ്ഞു. കേരള കോണ്ഗ്രസ് കടുത്തുരുത്തി നിയോജകമണ്ഡലം പ്രസിഡന്റ് മാഞ്ഞൂര് മോഹന്കുമാര് അധ്യക്ഷത വഹിച്ച സമ്മേളനത്തില് കടപ്ലാമറ്റം പഞ്ചായത്തിലെ വയല സര്വീസ് കോ-ഓപറേറ്റീവ് ബാങ്കിന്റെ പുതിയ പ്രസിഡന്റായി തെരഞ്ഞെടുക്കപ്പെട്ട ലൂക്കോസ് തടിയനാനി, കീഴൂര് സര്വീസ് കോ-ഓപറേറ്റീവ് ബാങ്ക് പ്രസിഡന്റായി തെരഞ്ഞെടുക്കപ്പെട്ട മാത്യു താന്നിനില്ക്കുംതടം എന്നിവര്ക്ക് സ്വീകരണം നല്കി.
കേരള കോണ്ഗ്രസ് ജില്ലാ പ്രസിഡന്റ് ജെയ്സണ് ജോസഫ്, സംസ്ഥാന അഡൈ്വസര് തോമസ് കണ്ണന്തറ, ഉന്നതാധികാര സമിതിയംഗങ്ങളായ സ്റ്റീഫന് പാറാവേലി, ജോസ്മോന് മുണ്ടക്കൽ, സാബു കൂവക്കാട്ട്, ജനറല് സെക്രട്ടറി പി.ടി. ജോസ് പാരിപ്പള്ളിൽ, ബ്ലോക്ക് പഞ്ചായത്ത് പ്രസിഡന്റ് തങ്കമ്മ വര്ഗീസ്, ജോസ് ജയിംസ് നിലപ്പന, കുഞ്ഞുമോള് റോയ്, ഷിജു പാറയിടുക്കിൽ, എ.ജെ. സാബു, ജോണി ഒറവങ്കര, ജോസ്മോന് മാളിയേക്കൽ, സി.എം. ജോര്ജ് തുടങ്ങിയവര് പ്രസംഗിച്ചു.