ഡമാസ്കസ്: ലബനനിലെ ഹിസ്ബുള്ള ഭീകരരും സിറിയയിലെ അഹമ്മദ് അൽ ഷാര ഭരണകൂടവും അഭിപ്രായഭിന്നതകൾ പറഞ്ഞുതീർക്കാനായി തുർക്കിയിൽ രഹസ്യചർച്ച നടത്തിയതായി വാർത്താ ഏജൻസി റിപ്പോർട്ട് ചെയ്തു. തുർക്കിയാണു ചർച്ചയ്ക്കു മുൻകൈയെടുത്തത്.
സിറിയൻ ആഭ്യന്തര യുദ്ധത്തിൽ പ്രസിഡന്‍റ് അസാദിനുവേണ്ടി ഹിസ്ബുള്ളകൾ പോരാടിയിരുന്നു. 2024 ഡിസംബരിൽ അൽ ഷാര നേതൃത്വം നല്കിയ വിമത സേന അസാദിനെ പുറത്താക്കി സിറിയയുടെ ഭരണം പിടിച്ചു.
ഇതിനുശേഷം അൽ ഷാര ഭരണകൂടവും ഹിസ്ബുള്ളകളും തമ്മിൽ ശത്രുത വർധിച്ചു. ഹിസ്ബുള്ളകൾ സിറിയയിലേക്ക് ആയുധം കടത്തുന്നതായി അൽ ഷാര ഭരണകൂടം ആരോപിച്ചു.
സിറിയൻ വിദേശകാര്യമന്ത്രാലയത്തിലെയും ഇന്‍റലിജൻസ് ഏജൻസികളിലെയും ഉദ്യോഗസ്ഥരാണു കഴിഞ്ഞമാസം ഹിസ്ബുള്ള പ്രതിനിധികളുമായി കൂടിക്കാഴ്ച നടത്തിയത്. പ്രശ്നങ്ങൾ പറഞ്ഞുതീർക്കാൻ ലക്ഷ്യമിട്ട് തുർക്കി ഇന്‍റലിജൻസ് വൃത്തങ്ങളാണു കൂടിക്കാഴ്ച സംഘടിപ്പിച്ചത്.
ശത്രുത അവസാനിപ്പിക്കാമെന്ന് ഇരു വിഭാഗവും യോഗത്തിൽ സമ്മതിച്ചതായാണു റിപ്പോർട്ട്. ഹിസ്ബുള്ളയെ നിരായുധീകരിക്കാനായി ലബനനിലേക്കു സൈന്യത്തെ അയയ്ക്കില്ലന്ന് സിറിയ ഉറപ്പുനല്കി. ഇതിനു പകരമായി തെക്കൻ സിറിയയിലെ ഹിസ്ബുള്ള സ്ലീപ്പർ സെല്ലുകൾ പിരിച്ചുവിടണമെന്നും ആവശ്യപ്പെട്ടു.
ഹിസ്ബുള്ളയെ പിന്തുണയ്ക്കുന്ന ഇറാനു യോഗത്തിലേക്കു ക്ഷണമുണ്ടായിരുന്നില്ലെന്നും റിപ്പോർട്ടിൽ പറയുന്നു. ഇറാനുമായി ബന്ധമുണ്ടാക്കുന്നതിൽ അൽ ഷാരയ്ക്കുള്ള എതിർപ്പായിരുന്നു ഇതിനു കാരണം.
അതേസമയം ഇറാന്‍റെ അനുമതിയോടെയാണ് ഹിസ്ബുള്ള യോഗത്തിൽ പങ്കെടുത്തത്. സിറിയയും ഹിസ്ബുള്ളയും തമ്മിൽ അന്തിമ ധാരണയുണ്ടാകാതിരുന്നത് ഇറാന്‍റെ അനിഷ്ടം മൂലമാണെന്നും പറയുന്നു.
Deepika
E-paper LOGIN
LOGIN
