ദക്ഷിണ കൊറിയയിൽ നിന്നുള്ള ഒരു വാർത്തയാണ് ഇപ്പോൾ സമൂഹമാധ്യമങ്ങളിൽ വ്യാപകമായി ചർച്ചയാകുന്നത്. 37 കാരിയായ ചോ സ്യൂങ്-യോൻ എന്ന സിംഗിൾ മദറും കണ്ടന്റ് ക്രിയേറ്ററുമാണ് തന്റെ വിവാഹമോചനം വ്യത്യസ്തമായ രീതിയിൽ ആഘോഷിച്ച് ശ്രദ്ധ നേടിയിരിക്കുന്നത്. ബന്ധം വേർപെടുത്തുന്നതിനെ ദുഃഖകരമായ ഒന്നായി കാണുന്നതിന് പകരം, ജീവിതത്തിന്റെ പുതിയൊരു തുടക്കമായാണ് അവർ കണ്ടത്.
അടുത്ത സുഹൃത്തുക്കളെ മാത്രം പങ്കെടുപ്പിച്ചുകൊണ്ട് ഒരുക്കിയ പ്രത്യേക ആഘോഷത്തിന്റെ ദൃശ്യങ്ങൾ ചോ തന്റെ ഇൻസ്റ്റാഗ്രാം പേജിലൂടെ പങ്കുവെക്കുകയുണ്ടായി. തിളങ്ങുന്ന വസ്ത്രം ധരിച്ച് സുഹൃത്തുക്കളോടൊപ്പം കേക്ക് മുറിച്ചും സന്തോഷം പങ്കുവെച്ചും അവർ ഈ ദിനം അവിസ്മരണീയമാക്കി. തന്റെ വിവാഹച്ചടങ്ങിനേക്കാൾ മനോഹരമായിരുന്നു ഈ വിവാഹമോചന ചടങ്ങ് എന്ന രീതിയിലുള്ള ദൃശ്യങ്ങളിലെ വരികൾ ഇതിനോടകം തന്നെ നിരവധി പേരുടെ ശ്രദ്ധ ആകർഷിച്ചിട്ടുണ്ട്. കടുത്ത പ്രതിസന്ധിഘട്ടങ്ങളിൽ തന്നോടൊപ്പം നിലകൊണ്ട പ്രിയപ്പെട്ടവരോടുള്ള നന്ദിയും സ്നേഹവും അവർ ഈ അവസരത്തിൽ തുറന്നുകാട്ടി.
സമൂഹത്തിൽ വിവാഹമോചിതരായ സ്ത്രീകൾ നേരിടുന്ന മുൻവിധികളെയും ഒറ്റപ്പെടുത്തലുകളെയും ചോദ്യം ചെയ്യുക എന്നുകൂടി ലക്ഷ്യമിട്ടാണ് താൻ ഈ ആഘോഷം സംഘടിപ്പിച്ചതെന്ന് ചോ മാധ്യമങ്ങളോട് വ്യക്തമാക്കി. വിവാഹബന്ധം അവസാനിക്കുന്നത് വ്യക്തിപരമായ പരാജയമായി കരുതുന്ന പഴയകാല ചിന്താഗതികൾ മാറേണ്ടതുണ്ടെന്നും, സ്വന്തം വ്യക്തിത്വം വീണ്ടെടുത്ത് പുതിയൊരു ജീവിതം കെട്ടിപ്പടുക്കാൻ സ്ത്രീകൾക്ക് കഴിയണമെന്നും അവർ വിശ്വസിക്കുന്നു.
വിവാഹത്തിന്റെ ചട്ടക്കൂടുകൾക്കപ്പുറം സ്വന്തം സന്തോഷത്തിനും മനസമാധാനത്തിനും മുൻഗണന നൽകിയ ചോയുടെ ഈ തീരുമാനത്തിന് വലിയ പിന്തുണയാണ് സമൂഹമാധ്യമങ്ങളിൽ നിന്ന് ലഭിക്കുന്നത്. ഒപ്പം, ബന്ധങ്ങൾ തകരുമ്പോൾ കൂടെ നിന്ന സൗഹൃദങ്ങളെയും പിന്തുണച്ചവരെയും ആദരിക്കാനും ഈ ഒത്തുചേരൽ വേദിയായി മാറി.