കൊച്ചി: സംസ്ഥാനത്തു വാതിലുകൾ തുറന്നിട്ട് സർവീസ് നടത്തിയതിന് 2,021 സ്വകാര്യ ബസുകൾക്കെതിരേ കേസെടുത്തു. സെപ്റ്റംബര്‍ 23 മുതല്‍ 30 വരെ പൊലിസ് സംസ്ഥാനവ്യാപകമായി സംഘടിപ്പിച്ച സ്പെഷ്യല്‍ ഡ്രൈവിലാണ് ഇത്രയധികം ബസുകൾ പിടിയിലായത്.
ഡ്രൈവിന്‍റെ ഭാഗമായി 31,408 ബസുകള്‍ പരിശോധിച്ചു. നിയമലംഘനം നടത്തിയ 2021 ബസുകള്‍ക്കായി 5,57,000 രൂപയാണു പിഴയീടാക്കിയത്. ഡ്രൈവിന്‍റെ ഭാഗമായി 2014 ബോധവത്കരണ പരിപാടികള്‍ നടത്തിയതില്‍ 10,784 പേർ പങ്കെടുത്തു.
തുറന്നുവച്ച വാതിലിലൂടെ യാത്രക്കാര്‍ തെറിച്ചുവീണുണ്ടായ അപകടങ്ങളില്‍ മരണങ്ങളും ഗുരുതര പരിക്കുകളും റിപ്പോര്‍ട്ട് ചെയ്ത സാഹചര്യത്തിലാണു പൊലിസ് പരിശോധന നടത്തിയത്.
തിരുവനന്തപുരം, എറണാകുളം ജില്ലകളില്‍ തുറന്നുവച്ച വാതിലിലൂടെ തെറിച്ചുവീണുണ്ടായ അപകടങ്ങളില്‍ യാത്രക്കാര്‍ മരിക്കുകയും തൃശൂര്‍ ജില്ലയില്‍ യാത്രക്കാരനു പരിക്കേല്‍ക്കുകയും ചെയ്തിരുന്നു. ഈ സാഹചര്യത്തില്‍ ബസുകള്‍ ഓടുമ്പോള്‍ വാതിലുകള്‍ നിര്‍ബന്ധമായും അടച്ചിടുന്നുണ്ടെന്നും അവ സുരക്ഷിതമാണെന്നും ഉറപ്പുവരുത്താനാണ് ഡ്രൈവ് സംഘടിപ്പിച്ചത്.
ട്രാഫിക് ആന്‍ഡ് റോഡ് സേഫ്റ്റി മാനേജ്മെന്‍റ് ഇന്‍സ്പെക്്ടര്‍ ജനറലിന്‍റെ മേല്‍നോട്ടത്തില്‍ ജില്ലാ പൊലിസ് മേധാവിമാര്‍, ട്രാഫിക് സോണല്‍ എസ്പിമാര്‍, എന്‍ഫോഴ്സ്മെന്‍റ് വിഭാഗം എന്നിവരുടെ പങ്കാളിത്തത്തോടെയായിരുന്നു ഡ്രൈവ് നടത്തിയത്. ഹൈവേ പട്രോള്‍ യൂണിറ്റുകളും എന്‍ഫോഴ്സ്മെന്‍റ് വിഭാഗവും തുടര്‍ന്നുള്ള ദിവസങ്ങളിലും പരിശോധനകള്‍ തുടരും.
നിയമലംഘനങ്ങള്‍ ശ്രദ്ധയില്‍പ്പെട്ടാല്‍ ട്രാഫിക് ആന്‍ഡ് റോഡ് സേഫ്റ്റി മാനേജ്മെന്‍റിന്‍റെ റോഡ് സുരക്ഷാസംരംഭമായ ശുഭയാത്ര വാട്സാപ് നമ്പര്‍ (9747001099) മുഖേന നിയമലംഘനങ്ങളുടെ ഫോട്ടോ, ഓഡിയോ, വീഡിയോ എന്നിവയോടൊപ്പം നിയമലംഘനം നടന്ന ജില്ല, സ്ഥലം, തീയതി, സമയം, വാഹനത്തിന്‍റെ നമ്പര്‍ ഉള്‍പ്പടെ പൊതുജനങ്ങള്‍ക്ക് അറിയിക്കാം.
Deepika
Corehub Solutions
E-paper LOGIN
LOGIN
