ചെന്നൈ സൂപ്പർ കിംഗ്സിന്റെ മെന്ററായി ചുമതലയേറ്റതിന് പിന്നാലെ, ഐപിഎൽ ചരിത്രത്തിലെ തന്റെ സുവർണ കളിക്കളത്തിന് തിരശീലയിട്ടിരിക്കുകയാണ് ഇന്ത്യൻ ക്രിക്കറ്റ് ഇതിഹാസം എം.എസ് ധോണി. വിക്കറ്റ് കീപ്പർ- ബാറ്ററായി നീണ്ട വർഷങ്ങൾ ടീമിനെ നയിച്ച ധോണിയുടെ പുതിയ ചുവടുമാറ്റത്തിന് പിന്നാലെ സിനിമാലോകത്തുനിന്നും നിരവധി പ്രമുഖരാണ് സ്നേഹവും ആശംസകളുമായി രംഗത്തെത്തിയിരിക്കുന്നത്.
'ഒരാൾ നമ്മുടെ കൺമുന്നിൽ വച്ച് ഒരു ഇതിഹാസമായി വളരുന്നത് കാണാൻ ഭാഗ്യം ലഭിച്ച തലമുറയിൽ പെടാൻ കഴിഞ്ഞതിൽ സന്തോഷം!' എന്ന് നടൻ കാർത്തി എക്സിൽ കുറിച്ചു. 'ധോണി സാർ, നമ്പർ 7 എന്നത് ഒരിക്കലും ഒരു നമ്പർ മാത്രമല്ല. ചെന്നൈയെ സംബന്ധിച്ചിടത്തോളം അത് എണ്ണമറ്റ വികാരങ്ങളും അവിസ്മരണീയമായ വിജയങ്ങളുമാണ്. നിങ്ങളുടെ വിനയവും ലാളിത്യവും കോടിക്കണക്കിന് ആളുകളെയാണ് സ്വാധീനിച്ചത്. യാത്ര എവിടേക്കായാലും നിങ്ങൾ എന്നും ഞങ്ങളുടെ 'തല'യായിരിക്കും,' കാർത്തി കുറിച്ചു.
ധോണിയുടെ മൈതാനത്തിനകത്തെയും പുറത്തെയും മനോഹരമായ നിമിഷങ്ങൾ കോർത്തിണക്കിയ ഒരു വീഡിയോ പങ്കുവച്ചുകൊണ്ടാണ് സംഗീതസംവിധായകൻ ജി.വി. പ്രകാശ് ആശംസകൾ നേർന്നത്. 'എന്നും ഞങ്ങൾ നിങ്ങളെ സ്നേഹിക്കുന്നു എം.എസ്. ധോണി,' അദ്ദേഹം കുറിച്ചു.
സംവിധായകനും എഴുത്തുകാരനുമായ രത്നകുമാറും ധോണിക്ക് നന്ദി അറിയിച്ചു. 'നിങ്ങളെ മഞ്ഞക്കുപ്പായത്തിൽ എക്കാലവും കാണാൻ ഞങ്ങൾ അത്യാഗ്രഹിച്ചുപോയി, ക്ഷമിക്കുക. ക്രിക്കറ്റ് വിജയങ്ങളുടെ സമയത്ത് എപ്പോഴും നിശബ്ദനായി ഒതുങ്ങിനിന്നതുപോലെ, യാതൊരു ഒച്ചപ്പാടുകളുമില്ലാതെയാണ് നിങ്ങൾ നിങ്ങളുടെ പാരമ്പര്യം കൈമാറി പടിയിറങ്ങുന്നത്,' രത്നകുമാർ കുറിച്ചു.
ക്രിക്കറ്റ് പശ്ചാത്തലത്തിൽ സിനിമയൊരുക്കിയ സംവിധായകൻ വെങ്കട്ട് പ്രഭുവും ധോണിക്ക് നന്ദി പറഞ്ഞുക്കൊണ്ട് രംഗത്തെത്തി. 'എല്ലാത്തിനും നന്ദി! എല്ലാ സ്നേഹത്തിനും ഓർമകൾക്കും പ്രചോദനത്തിനും നന്ദി! യാത്ര പറയട്ടെ എന്റെ ക്യാപ്റ്റൻ!' എന്ന് അദ്ദേഹം കുറിച്ചു. നടൻ ധനുഷും ഇതിനോടകം തന്നെ ധോണിക്കുള്ള സ്നേഹാന്വേഷണങ്ങൾ സോഷ്യൽ മീഡിയയിലൂടെ പങ്കുവച്ചിരുന്നു. ചെന്നൈ സൂപ്പർ കിംഗ്സിനൊപ്പം മെന്ററുടെ പുതിയ റോളിൽ ധോണി തിളങ്ങുമെന്ന പ്രതീക്ഷയിലാണ് ആരാധകരും സിനിമാലോകവും.