ചപ്പാരപ്പടവ്: ചപ്പാരപ്പടവ് പഞ്ചായത്തിലെ പടപ്പേങ്ങാട്, കൂവേരി, പൂണംകോട് പ്രദേശങ്ങളിൽ കുരങ്ങുശല്യം കാരണം കർഷകരും ജനങ്ങളും പൊറുതി മുട്ടുന്നു. കൂട്ടമായി എത്തുന്ന കുരങ്ങുകൾ തേങ്ങയും കരിക്കുകളും ഉൾപ്പെടെ വ്യാപകമായി നശിപ്പിക്കുകയാണ്.
തേങ്ങ, കരിക്ക് എന്നിവയ്ക്കു പുറമേ മറ്റ് ഇടവിള കൃഷികളും ഫലവൃക്ഷങ്ങളും നശിപ്പിക്കുന്നുണ്ട്. കുരങ്ങുകളെ ഓടിക്കാൻ ശ്രമിക്കുമ്പോൾ ഇവ ജനവാസ മേഖലകളിലേക്കും വീടുകളുടെ പരിസരങ്ങളിലേക്കും ഇറങ്ങുന്നതും ആക്രമണ സ്വഭാവം കാട്ടുന്നതും ജനങ്ങളെ ഭീതിയിലാക്കുന്നുണ്ട്. കുരങ്ങുശല്യം കാരണം കാർഷിക മേഖലയെ ആശ്രയിച്ചു കഴിയുന്ന ജനങ്ങളുടെ വരുമാനം പൂർണമായും ഇല്ലാതായ അവസ്ഥയിലാണ്.
കുരങ്ങുശല്യത്തിന് പരിഹാരം കാണാൻ വനംവകുപ്പ് കൂടുവച്ച് കുരങ്ങുകളെ പിടികൂടി ഉൾവനത്തിലേക്ക് മാറ്റണമെന്ന ആവശ്യം ശക്തമാണ്.
വന്യമൃഗങ്ങളെ തുരത്തുന്നതിനായി സോളാർ ഫെൻസിംഗ് പോലുള്ള ആധുനിക പ്രതിരോധ സംവിധാനങ്ങൾ ഏർപ്പെടുത്തുക, കൃഷിനാശം സംഭവിച്ച കർഷകർക്ക് അർഹമായ നഷ്ടപരിഹാരം നൽകുക, കൃഷിയിടങ്ങളിൽ പടക്കം പോലുള്ള ശബ്ദമുണ്ടാക്കുന്ന സുരക്ഷാ ഉപകരണങ്ങൾ സ്ഥാപിക്കാൻ സബ്സിഡി സഹായം അനുവദിക്കുക, കുരങ്ങുകളെ തുരത്തുന്നതിന് പ്രത്യേക ദ്രുതകർമ സേനയുടെ സേവനം ഉറപ്പാക്കുക എന്നീ ആവശ്യങ്ങളും കർഷകർ ഉന്നയിച്ചു. ഇക്കാര്യങ്ങൾ ചൂണ്ടിക്കാട്ടി എംഎൽഎ ഉൾപ്പടെയുള്ളവർക്ക് നിവേദനം നൽകാനും കർഷകർ തീരുമാനിച്ചിട്ടുണ്ട്.