ബേക്കൽ: പതിനഞ്ചാം പഞ്ചവത്സര പദ്ധതിയുമായി ബന്ധപ്പെട്ട് ജില്ലയുടെ വികസന മുൻഗണനകൾ നിശ്ചയിക്കുന്നതിനും വിവിധ മേഖലകളിലെ വികസന സാധ്യതകളും വെല്ലുവിളികളും ചർച്ച ചെയ്യുന്നതിനുമുള്ള ചര്ച്ചകള്ക്ക് തുടക്കമായി. ബേക്കൽ ബീച്ച് പാർക്കില് നടന്ന ജില്ലാതല ആശയ-അഭിപ്രായ രൂപീകരണ യോഗം തദ്ദേശ സ്വയംഭരണ മന്ത്രി കെ.എം. ഷാജി ഓണ്ലൈനായി ഉദ്ഘാടനം ചെയ്തു.
തദ്ദേശ സ്ഥാപനങ്ങൾ മാതൃകാപരമായ ആസ്തികൾ ഉണ്ടാക്കണമെന്നും സ്വയം തൊഴിൽദാതാക്കളായി മാറണമെന്നും അദ്ദേഹം പറഞ്ഞു. കേന്ദ്രസർക്കാർ കേരളത്തെ ഒരു നഗര സംസ്ഥാനമായാണ് പരിഗണിക്കുന്നത്. ഈ പശ്ചാത്തലത്തില് ലഭിക്കുന്ന കേന്ദ്രവിഹിതത്തെ ഫലപ്രദമായി വിനിയോഗിക്കുന്നതിനുള്ള പദ്ധതികൾക്ക് രൂപം നൽകണം.
കൂടുതൽ തൊഴിലവസരങ്ങൾ സൃഷ്ടിക്കുന്ന പദ്ധതികൾക്ക് പ്രാധാന്യം നൽകണം. മാലിന്യസംസ്കരണം ഉൾപ്പടെയുള്ള മേഖലകളിൽ മാതൃകാ പദ്ധതികൾ തയാറാക്കുന്നതിനുള്ള നിർദേശങ്ങൾ ഉണ്ടാകണമെന്ന് മന്ത്രി പറഞ്ഞു. കെ. നീലകണ്ഠൻ എംഎൽഎ അധ്യക്ഷത വഹിച്ചു. സംസ്ഥാന ആസൂത്രണ ബോർഡ് വൈസ് ചെയർമാൻ കെ.എം. ചന്ദ്രശേഖർ മുഖ്യപ്രഭാഷണം നടത്തി. രാജ് മോഹൻ ഉണ്ണിത്താൻ എംപി മുഖ്യാതിഥിയായി. എംഎൽഎമാരായ എ.കെ.എം. അഷ്റഫ്, കല്ലട്ര മാഹിൻ, ഗോവിന്ദൻ പള്ളിക്കാപ്പിൽ, ജില്ലാ ആസൂത്രണ സമിതി ചെയർമാനായ ജില്ലാ പഞ്ചായത്ത് പ്രസിഡന്റ് സാബു ഏബ്രഹാം, കളക്ടർ ശ്രീധന്യ സുരേഷ്, മുൻ തദ്ദേശസ്വയംഭരണ മന്ത്രി സി.ടി. അഹമ്മദലി എന്നിവർ പ്രസംഗിച്ചു.
സംസ്ഥാന ആസൂത്രണ ബോർഡിന്റെ നേതൃത്വത്തിൽ നടന്ന യോഗത്തിൽ ജനപ്രതിനിധികളും വിവിധ വകുപ്പുകളിലെ ജില്ലാതല ഉദ്യോഗസ്ഥരും വിവിധ മേഖലകളിലെ വിദഗ്ധർ, ഗവേഷകർ, സംരംഭകർ, സന്നദ്ധ സംഘടനകളുടെ പ്രതിനിധികൾ തുടങ്ങിയവരും ആശയങ്ങൾ പങ്കുവച്ചു.