കൂത്താട്ടുകുളം: വിഷു ആഘോഷങ്ങൾക്ക് മാറ്റുകൂട്ടാൻ കൂത്താട്ടുകുളം നഗരത്തിൽ പടക്ക വിപണി സജീവം.ശബ്ദത്തേക്കാൾ ഉപരിയായി ആകാശത്ത് വിസ്മയം തീർക്കുന്ന വർണപ്പടക്കങ്ങൾക്കാണ് ഇത്തവണ ആവശ്യക്കാർ ഏറെ. വൈവിധ്യമാർന്ന കമ്പിത്തിരികൾ, നിലചക്രങ്ങൾ, മ്യൂസിക്കൽ ക്രാക്കേഴ്സ്, ആകാശത്ത് പല നിറങ്ങളിൽ വിരിയുന്ന അമിട്ടുകൾ എന്നിവ വിപണിയിൽ നിരന്നു കഴിഞ്ഞു.
കുട്ടികൾക്കായി അപകടമില്ലാത്തതും ശബ്ദം കുറഞ്ഞതുമായ ഇനങ്ങൾ വാങ്ങാനാണ് രക്ഷിതാക്കൾക്ക് താല്പര്യം. കഴിഞ്ഞ വർഷത്തെ അപേക്ഷിച്ച് പടക്കങ്ങൾക്ക് നേരിയ വിലവർധനവ് ഉണ്ടെങ്കിലും ആഘോഷം ഗംഭീരമാക്കാൻ ഇവ വാങ്ങാൻ ആരും മടിക്കുന്നില്ല. മുൻവർഷങ്ങളിലേതുപോലെ ശിവകാശിയിൽ നിന്നുള്ള പടക്കങ്ങളാണ് വിപണിയിലെ താരം.