കൊച്ചി: അന്താരാഷ്‌ട്രവിപണിയിൽ സ്വര്‍ണവിലയിലെ ചാഞ്ചാട്ടവും ഡോളറിനെതിരേ രൂപയുടെ മൂല്യത്തകര്‍ച്ചയും കേരളത്തിലെ സ്വര്‍ണവ്യാപാര മേഖലയ്ക്ക് വെല്ലുവിളിയാകുന്നു.
സ്വര്‍ണവില ഉയരുമ്പോള്‍ ആഭരണങ്ങള്‍ വാങ്ങുന്നവരുടെ എണ്ണം മാത്രമല്ല, വാങ്ങുന്ന സ്വര്‍ണത്തിന്‍റെ അളവും കുറയാന്‍ സാധ്യതയുണ്ട്. അതേസമയം, പഴയ സ്വര്‍ണം വില്‍ക്കുന്നതിനും കൈമാറ്റം ചെയ്യുന്നതിനും ഉപഭോക്താക്കള്‍ കൂടുതല്‍ താത്പര്യം കാണിക്കുന്നത് വ്യാപാരമേഖലയില്‍ പുതിയ മാറ്റങ്ങള്‍ക്ക് വഴിയൊരുക്കും.
രാജ്യത്തെ സ്വര്‍ണ ആവശ്യത്തിന്‍റെ വലിയൊരു ഭാഗം ഇറക്കുമതിയിലൂടെയാണ് നിറവേറ്റുന്നത്. അതിനാല്‍ അന്താരാഷ്‌ട്ര വിപണിയിലെ വിലവര്‍ധനയ്‌ക്കൊപ്പം ഡോളറിനെതിരേ രൂപയുടെ മൂല്യം ഇടിയുന്നതും ആഭ്യന്തര സ്വര്‍ണവിലയെ ബാധിക്കുന്നു. അന്താരാഷ്‌ട്രവിപണിയിലെ വിലയും വിനിമയനിരക്കും ഒരേസമയം പ്രതികൂലമാകുമ്പോള്‍ കേരളത്തിലെ ഉപഭോക്താക്കള്‍ക്കു സ്വര്‍ണം വാങ്ങാനുള്ള ചെലവ് ഗണ്യമായി വര്‍ധിക്കും.
ഉയര്‍ന്ന വിലയില്‍ ഉപഭോക്താക്കള്‍ ഭാരം കുറഞ്ഞ ആഭരണങ്ങള്‍, 18 കാരറ്റ് സ്വര്‍ണം, പഴയ സ്വര്‍ണം കൈമാറിയുള്ള വാങ്ങല്‍ തുടങ്ങിയ മാര്‍ഗങ്ങളിലേക്കു മാറാന്‍ സാധ്യതയേറെയാണ്. വില ഉയരുന്നത് പഴയ സ്വര്‍ണം വില്‍ക്കാനും പുനരുപയോഗത്തിനായി കൈമാറാനും കൂടുതല്‍ പേരെ പ്രേരിപ്പിച്ചേക്കാം. പഴയ സ്വര്‍ണം ശുദ്ധീകരിച്ച് വീണ്ടും ഉപയോഗിക്കുന്നത് പുതിയ സ്വര്‍ണത്തിന്‍റെ ഇറക്കുമതി ആവശ്യകത കുറയ്ക്കുന്നതിനും സഹായകമാകും.
എന്നാല്‍ , സ്വര്‍ണവില ഉയരുന്നതുകൊണ്ടു മാത്രം വ്യാപാരമേഖലയുടെ വിറ്റുവരവും ലാഭവും വര്‍ധിക്കണമെന്നില്ല. വില്പനയുടെ അളവ്, ഉപഭോക്താക്കളുടെ വാങ്ങല്‍ശേഷി, ഉത്പാദനച്ചെലവ്, പ്രവര്‍ത്തനച്ചെലവ് എന്നിവയും വ്യാപാരത്തിന്‍റെ ഭാവി നിര്‍ണയിക്കും. അതിനാല്‍ വിലക്കയറ്റം സൃഷ്‌ടിക്കുന്ന അവസരങ്ങള്‍ക്കൊപ്പം ഉപഭോക്തൃ ആവശ്യത്തിലുണ്ടാകാവുന്ന കുറവും വ്യാപാരികള്‍ പരിഗണിക്കേണ്ടതുണ്ട്.
കേരളത്തിലെ സ്വര്‍ണവിലയുടെ ഭാവി നിര്‍ണയിക്കുന്നതില്‍ ആഗോളവിപണിക്കൊപ്പം രൂപയുടെ മൂല്യത്തിനും നിര്‍ണായക സ്ഥാനമുണ്ട്.
ഉയര്‍ന്ന സ്വര്‍ണവില ഇന്ത്യയുടെ ഔദ്യോഗിക സ്വര്‍ണശേഖരത്തിന്‍റെ മൂല്യം വര്‍ധിപ്പിക്കാമെങ്കിലും ഇറക്കുമതിക്ക് കൂടുതല്‍ രൂപ ചെലവഴിക്കേണ്ടിവരുന്നത് രാജ്യത്തിന്‍റെ സാമ്പത്തികനിലയെയും ഉപഭോക്താക്കളുടെ വാങ്ങല്‍ശേഷിയെയും ബാധിക്കാം. അതിനാല്‍ സ്വര്‍ണവിലയിലെ വര്‍ധനയുടെ നേട്ടങ്ങളും ചെലവുകളും ഒരുപോലെ വിലയിരുത്തണം.
സുതാര്യമായ വ്യാപാരരീതികള്‍, പഴയ സ്വര്‍ണത്തിന്‍റെ ചിട്ടയായ പുനരുപയോഗം, ഉപഭോക്താക്കളുടെ വിശ്വാസം എന്നിവ കേരളത്തിലെ സ്വര്‍ണവ്യാപാരത്തിന്‍റെ സുസ്ഥിര വളര്‍ച്ചയ്ക്കു നിര്‍ണായകമാകും.
സ്വര്‍ണത്തിന്‍റെ വില നിര്‍ണയിക്കുന്നത് അന്താരാഷ്‌ട്ര വിപണിയിലെ സാഹചര്യങ്ങള്‍ മാത്രമല്ല, രൂപയുടെ മൂല്യവും കൂടിയാണെന്ന് കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്‍റ്സ് അസോസിയേഷന്‍ ജനറല്‍ സെക്രട്ടറി അഡ്വ. എസ്. അബ്‌ദുള്‍ നാസര്‍ പറഞ്ഞു.
Deepika
Corehub Solutions
E-paper LOGIN
LOGIN
